Lurraren eta ingurumenaren defentsa, elikadura burujabetza, emakumeen eta LGTBIQ+ komunitatearen eskubideak eta bakerako eskubideak izango ditu hizpide Herri Babesareak antolatutako aurreneko foro ibiltariak. Hernanira asteazkenean iritsiko da.
EAEko 8 udalerriren sarea
Herri Babesarea Araba, Bizkaia eta Gipuzkoako 8 udalerrik osatzen dute: Agurain, Ea, Durango, Zornotza, Donostia, Errenteria, Irun eta Hernanik. Hain zuzen, Hernaniko Udaleko pasa den urriko Plenoak aho batez erabaki zuen bertako kide izatea.
Bakerako Nazioarteko Brigadek eta Mundubat Fundazioak bultzatutako ekimena da, eta Garapenerako Lankidetzaren Euskal Agentziak eta Gipuzkoako Foru Aldundiak sustatzen dute.
Herri Babesarearen aurkezpen instituzionala Gasteizen eta Bilbon egingo da, eta Hernaniko Udaleko ordezkariak bertan izango dira. Ondoren, hitzaldiak emango dira herriz herri; Hernanin, hilaren 10ean.
Giza eskubideez, Honduras, Mexiko eta Palestinatik
Aurreneko foro honetan, giza eskubideen defentsa egingo da, hainbat alorretatik. Hernanira etorriko diren hizlariak izango dira, Hondurastik, LGBT Arcoíris Elkarteko Esdra Yaveth Sosa; Mexikotik, Oaxaca Kontsortzioko Emilie Chantal de Wolf; eta Palestinatik, Union of Palestinian Women Committees (UPWC).
Aurrenekoak Hondurasko LGTBIQ+ komunitatearen giza-eskubideak, eragin politikoa, osasuna eta GIB/HIESaren prebentzioa defendatzen ditu. Comayagüelako eta Tegucigalpako hirietan egiten dute lan.
Oaxacako Partzuergoa, bestalde, erakunde zibil eta feminista da, eta emakumeen giza-eskubideen errespetua eta erabilera sustatzen ditu, eta baita genero-berdintasuna ere. 2003an sortu zen, legegintzan eta politika publikoko prozesuetan eragina edukitzeko asmoz.
Azkenik, Palestinako aktibistak okupaziopean giza eskubideak defendatzen dituzten emakumeak izango ditu hizpide. UPWCk Gazan eta Zisjordanian dauka presentzia, eta sustatzen ditu emakume palestinarren autonomia, gizon eta emakumeen arteko berdintasunezko harremanak eta gizarte-maila guztietan berdintasuna.
Hizlari hauei guztiei asteazkenean egingo die harrera Udalak, 17:00etan, eta ondoren, mahai-inguruan arituko dira Biteri kultur etxean.
Guatemala, Kolonbia eta Mendebaldeko Sahara
Hernanin izango diren hizlariez gain, gehiago ere ibiliko dira herriz herri, aurreneko foro ibiltari honetan. Guatemalatik Nekazarien Batasunerako Batzordearen berri emango da; Kolonbiatik, Nomadesc, bakearen eraketarako ikerketa eta gizarte ekintzarako elkartearena; eta Mendebaldeko Saharatik, ASVDH, Marokoko estatuak egindako giza eskubideen urraketa larrietako biktimen elkartearena. Hauek denak, asteazkenean bertan Errenterian izango dira.