Bi talde dauzka aurten Hernaniko Waterpolo elkarteak: nesken jubenil mailakoa, eta mutilen senior mailakoa. Iaz saiatu ziren nesken taldea osatzen, baina ez zuten lortu. Aurten bai. Halaxe azaldu du Jon Imanol Fernandez entrenatzaileak. «Iaz ez genuen lortu taldea osatzea, baina aurten sartu da Waterpolo Donosti ere, eta egin da taldea, hiru kluben artean». Denera, 13 jokalarik osatzen dute nesken jubenilen taldea, Waterpolo Donosti, Fortuna eta Hernaniko jokalariekin. Ez dute oraindik Liga hasi. Euskal Herrikoan ariko dira, beste bost bat talderekin, hilaren bukaeratik aurrera.
Mutilak, bestalde, senior mailakoak dira, eta badira urte batzuk taldea osatu zutela. Donostia eta Orioko jokalariren bat bada, baina hernaniarrak dira gehienak. Liga hasia dute, Euskal Herriko bigarren mailan. Getxoren aurkako partidua, aurrenekoa, puntu bakarraren aldearekin galdu zuten, eta bigarrena ere, pasa den asteburuan, galdu egin zuten Sestaoren kontra, 9-11. Baina talde indartsuak dira horiek, eta Hernanikoa ere «sendo» dago aurten, entrenatzailearen esanetan. Gaur, Santoñaren kontra ariko dira, etxean berriro, 13:30etan.
«Malabareak» batetik, «egoera zailagoa» bestetik
Talde bakoitzak bere berezitasunak ditu, eta helburuak ere, desberdinak dira.
Neskek batzuetan Hernanin entrenatzen dute; beste batzuetan, Donostian. Etxeko partiduak ere halaxe izango dira, han eta hemen. Talde bakoitzeko entrenatzaile bat daukate, eta denen artean koordinatu beharra daukate. «Malabareak» egin beharra izaten da zailtasuna, askotan. «Hiru ekipoen artean talde hau egitea da kontua». Baina helburua ere, horixe da, «ikustea taldea badagoela, eta beraiek ere elkar ezagutzea, batzuk berriak baitira. Disfrutatu eta gozatu dezatela. Azken batean, proiektua da waterpoloan arituko diren neskak lortzea eta talde sendoa egitea maila honetan, gero seniorretan jokatzera iristeko».
Jubeniletako neskek hilaren bukaeran hasiko dute Liga. Seniorretako mutilak hasi dira; gaur, 13;30etan, Santoña hartuko dute etxean.
Seniorretan ari direnak, oraingoz, mutilak dira, eta esperientzia gehiago daukate. «Baja batzuk izan ditugu, baina beste jokalari batzuk errekuperatu ditugu, eta denek ezagutzen dute elkar. Ekipo sendoa da. Aurreko urtean ere denboraldi oso ona egin genuen, eta gutxienez hori berdintzea daukagu helburu». Horretarako, ordea, nahikoa lan izango dute. «Zailago dago aurten. Iaz bi multzo ginen, eta horietatik hiru talde pasatzen ziren goiko fasera. Aurten, berriz, hiru multzo gara eta bi talde pasako dira goiko fasera. Gurean, zuzeneko aurkariak ditugu Getxo, Sestao eta Santoña. Oso sendoak dira. Sestao aurreneko mailara igotzeko dagoen taldea da. Getxo ere indartsua da, eta puntu bakarraren aldearekin galdu genuen haien kontra».
Egoera zailagoan dago Hernani, beraz, baina waterpoloa, egoera hobean dagoelako. «Bigarren talde gehiago daude aurten. Lehendabiziko taldea dutenek bigarrena atera dute, eta talde gehiago egoteak zailtzen du gorako fasera sartzea lortzea. Baina gehienak nahiko paretsu ibiliko gara. Aurten, berrienak Logroñokoak dira. Baliteke horiek izatea irabazteko 'errazenak', baina komatxo artean. Ikusiko da».
Erasoan bakarka, defentsan taldean
Denboraldiari pixkanaka egin beharko diote aurre hortaz, bi taldeek. Pausoz pauso, pixkanaka-pixkanaka. Bi taldeen kasuan, ez dute erraz ikusten garaipenak pilatzea, baina ezta ezinezko ere.
Jubeniletako taldea nola moldatuko den ikusteko dago oraindik. «Entrenatzen duguna praktikan jartzea da erronka nagusia. Ez dugu buruan partiduak irabaztea. Uste dut irabazi daitekeela baten bat, baina jokalari gehienak berriak dira, eta beraz, jolas dezatela, martxa hartu dezagun, eta pixkanaka maila igo».
«Ekipo sendoa daukagu. Iaz oso denboraldi ona egin genuen, eta aurtengo erronka da, gutxienez, hori berdintzea. Baina zailago dago»
Elkar ezagutza hori garrantzitsua da waterpoloan, eta seniorretan «nabaria» da. «Elkar ezagutzean, jakiten duzu ondokoak nola jokatzen duen, zein abilezia dituen, eta horrekin jokatzen dugu. Jokoa bera errazagoa da. Saiatzen gara gehiago defentsa ona egiten, azken batean, oso inportantea delako. Erasoa gehiago da bakarkakoa, talde lana baino, eta horretaz baliatzen gara. Defentsa taldean eginez, aurrean. Lehen aipatutako laguntasun horrekin, elkar ezagutze horrekin jolasten dugu».
Joko horrekin ekingo diote hasi duten aurreneko faseari. Eguberrietara arte luzatuko da. Ondoren, Kopa jokatuko dute. Bigarren fasea, berriz, urtarrila edo otsaila artean hasiko da. Lehendabiziko fasean multzo bakoitzeko bik egingo dute aurrera, eta horiekin osatuko dute Top 6a. Horiek izango dira gero lehenengo mailara igotzeko fasera joango direnak. «Aurreko urtean goiko taldean ibili ginen, eta ikusi genuen igotzeko daudenak oso nabaria dutela, kalitatea. Oso zaila da igotzea. Baina horiekin jokatzean ondo ibili ginen. Aurreko denboraldia berdintzen badugu, kontentu!».