Euskadiko Ligan, bikain aritu dira Hernaniko Boleibol taldeko neska-mutilak, seniorretan. Neskek etxean jokatu zuten Lizardi Zarautzen kontra, eta hasieratik kontrolatu zuten partidua. Jokoa oso ona izan ez bazen ere, puntu batzuk borrokatuak izan ziren. Hala ere, 3 eta 0 nagusitu ziren, eta bitik bi irabazi dituzte, neskek.
Mutilak, bestalde, kanpoan aritu ziren; Gasteizen jokatu zuten Udapa Aranzbizkarraren kontra. Hernaniarrek 8-25, 12-25 eta 20-25 irabazi zuten, nahiko erraz. Hirugarren garaipena dute segidan, baina benetako proba asteburuan iritsiko da, etxean jokatzekoa duten partiduan.
Gazteek, partidu gogorrak
Bestelakoak izan ziren emaitzak gaztetxoenen artean. Kadeteek galdu egin zuten. Galtzen hasi eta hirugarren jokoa irabazi zuten, baina laugarrenak ihes egin zien.
Infantiletako bi taldeek ere galdu egin zuten; 3-0 Summa Aldapetaren aurrean, eta ikaragarri borrokatu ondoren, 2 eta 3, Peñafloridaren aurrean.