Beste behin ezusteko gutxi izan zen Hernaniko emaitzetan nahiz eta hauteskunde orokorrak izan. Azkenaldian gertatzen ari den bezala alderdi abertzaleak gero eta indartsuagoak dira hauteskunde hauetan eta alderdi espainiarrak gero eta indar gutxiago dute nahiz eta Estatuko Kongresurako hauteskundeak izan.
4.000ko langa berriz gainditu du EH Bilduk
Parte hartzeak eragina izan du horretan, EH Bildu eta EAJ-PNVren mesedetan. Honela, garailea, dudarik gabe, EH Bildu izan da berriz ere Hernanin. Gainera apirileko emaitzak hobetu ditu boto portzentaian eta kopuruan zortzi boto besterik ez ditu galdu, 4036rekin. Apirilean %35,59ko boto portzentaia lortu baldin bazuen, oraingoan %38,651ra iritsi da.
Bigarren alderdirik bozkatuena, aurrekoa errepikatuz, EAJ-PNV izan da. Alderdi jeltzaleak %21,8ko portzentaia lortu du, %0,7a igo delarik. Botoetan 105 jaitsi da.
Hirugarrena Podemos-IU izan da %2,6ko jaitsierarekin, ia %20tik %17,2ra. Alderdi sozialistaren emaitzak oso parekatuak izan dira apirilekoekin alderatu ezkero. Orduan botoen %15,8 lortu zuen eta orain %15,57, ia berdin, nahiz eta botoetan galera haundiagoa izan (164). Azkenik PPk botoak irabazi ditu Ciudadanosen kaltetan. Alderdi popularrera itzuli dira Ciudadanosera joandako boto kopuru bat. Hala ere beraien portzentaia %3,54ean geratzen da.
*Datu guztiak Espainiako Barne Ministerioak emandakoak dira.