Bihartik aurrera Jardunaldi Antierrepresiboak antolatu dituzte Urumea eraikinean. Lehenengo zatian Herrialde Katalanetan jarriko dute fokoa. Bihar, astelehenean, Terrasako Bruna Serra izango da Kataluniako egoera politikoaz hitzegingo duena begirada feministak, 19:00etatik aurrera. Nola antolatu diren eta emakumearen papera zein izan den aztertuko da.
Etzi, asteartean, Errepresioa herrialde Katalanetan: Procesetik haratago hitzaldia eskainiko du, 18:30etan, Askapeneko kidea den Izaskunek. Errepresio desberdinetaz ariko da hizketan.
Thailandiako egoerari buruz proiekzioak
Astea amaitzeko PM 2.5 Thailandiako egoera politikoaren inguruko proiekzio proiektua aurkeztuko da Urumea Herrigunean ostiraletik, azaroaren 15etik, igandera bitarte. Ostiralean 18:00etan hasiko dira proiekzioak eta larunbata eta igandean, 10:00etan eta 21:00etan.
«Thailandian pelikula batek emititu ahal izateko, ezin du monarkiaren edo gobernuaren aurkako ezer esan, ezin du erlijioa iraindu, pertsonen batasuna zalantzan jarri, eduki sexual asko izan, ez eta genitalik erakutsi ere. Thailandiaren dignitate eta ‘segurtasunaren’ izenean zentsura legeak dituzte horretarako» diote antolatzaileek.
«Zineastek, produzitzerakoan, ezin dute orden publikoa alteratu, ez eta moral egokia zalantzan jarri. Azken urteetan zazpi pelikula zentsuratu dira, 89 pertsona atxilotuak izan dira eta 203 ekintza publiko gaitzetsi dira». Horrexegatik Thailandiako zinema emanaldia eskainiko da.