Gaur eta bihar izango dituzte asteburu honetako norgehiagokak Hernani Eskubaloi Taldeko kideek. Denera, zortzi partidu izango dituzte; horietatik, hiru izango dira gaur, eta bost, aldiz, bihar.
Gaurko bi, kiroldegian
Gaur jokatuko dituzten hiru partidutik bi Hernanin izango dituzte: bata, goizean izango da; eta bestea, aldiz, arratsaldean.
Infantil mutilak izango dira jokatzen aurrenekoak; goizeko 10:00etan hasita, Elgoibar izango dute aurkari, Leoka taldekoek.
Arratsaldean, aldiz, nesken talde nagusia izango da lehiatuko dena; Hernaniko One Telecom ET taldeak, Ereintza taldea hartuko du. Arratsaldeko 18:00etatik aurrera izango da, kiroldegian.
Andoainen izango da gaurko beste partidua; eguerdiko 12:45etan izango da, Sesa Tools infantil nesken taldearen eta Leizaranen artean.
Otarra aurten ere, zozketan
Gabonetako zozketa egingo du, aurten ere, Hernaniko Eskubaloi Taldeak, eta dagoeneko salgai dituzte errifak 2,5 euroan. Zozketatuko duten otarra Anexo Elektrotresnaken jarriko dute, laster.