Aurreko asteburuko atsedenaren ondoren, aste honetan ekingo diote, berriro ere, Ligari, boleiboleko taldeek. Asteburu honetan, denera, bost partidu jokatuko dituzte; horietatik hiru, kiroldegian bertan izango dira.
Etxean, nesken taldeak besterik ez
Etxean jokatuko duten hiru taldeak emakumezkoenak izango dira. Eguerdiko 13:00ean daukate aurreneko hitzordu bikoitza; izan ere, bi partidu jokatuko dira, orduan.
Infantil neskek jokatuko dute, alde batetik, Peñafloridaren aurka.
Bestetik, Arantzazuko Ama taldearen kontra jokatuko dute kadete mailako neskek.
Arratsaldean ere izango da boleibolarekin gozatzeko aukera. 16:00etan hasita, senior emakumezkoen txanda izango da. Zarauzko Lizardi taldearen kontra neurtuko dituzte indarrak haiek.
Beste bi zita, kanpoan
Kanpoan, aldiz, bi partidu jokatuko dituzte. Donostiako Pio Barojan arituko da infantil nesken taldea, Summa Aldapeta 2-ren kontra, 10:00etan.
Senior mutilak, aldiz, Gasteizen lehiatuko dira, Udaparen kontra, 16:30etan.