Herritarrei zein komertzioei zuzenduta, argindarraren fakturan aurrezteko saioak ari dira eskaintzen, Gipuzkoa Argitu programaren barruan. Eta Hernanin izango dira berriro, Udalaren eta Gipuzkoako Foru Aldundiaren eskutik.
Azaroaren 12an izango da aurreneko saioa: Argindarraren kontsumoen informazio egokia eskuratu eta kontrolatzeko saio praktikoa. Udaberrian ere eskaini zuten saio hori bera, eta «izandako harrera ona» ikusita, bigarrenez antolatzea erabaki dute. Parte hartzeko, izena eman behar da aurretik, eta ostiralera bitarte dago epea: oihane@izadi21.eus helbidean, edota 686 427 565 telefonoan (08:00etatik 16:00etara).
Gainera, nahi duenak, gai horri buruzko bideo-tutorialak ere badauzka eskura, programaren atarian: www.gipuzkoaingurumena.eus/eu/argitu.
Energia berriztagarriak ezartzeko saioa, aurrenekoz
Bigarren saioa azaroaren 25ean egingo dute, eta berria izango da hori: Etxebizitzetan energia berriztagarriak ezartzeko saio praktikoa. Aurrenekoz eskainiko dute Hernanin, arratsaldeko 18:00etan Biterin; eta horretarako ere, izena eman behar da, bide berdinetan, azaroaren 22a baino lehen.
«Energia berriztagarrien inguruko araudia aldatu berri da, eta ondorioz, orain errazagoa da teknologia horiek etxebizitzetan erabiltzea», azaldu dute. Aditu batekin, modu praktikoan ezagutuko dute saioan, zein baldintza bete behar diren.