Mundu osoko mendietara eramango ditu herritarrak Mendiriz Mendik, proiekzio bidez, beste urte batez. Gaur hasiko da Mendizale Astea, eta ostiralera bitarte, egunero izango da proiekzio bana, Biterin.
Gaurkoan, hasiera emateko, Jon Sasigain, Aitor Zabarte eta Aitzol Mendizabal eskiatzaileak egongo dira bertan, arratsaldeko 19:30etan hasita, Eskia Argentina, Japonia eta Auñamendietan izeneko proiekzioarekin. Hain justu, ezagutzera emango dituzte, Pirineoetan, Andeetan eta Japonian barrena dauden eski eremu ezberdinak, beraien esperientzia eta bizipenak azalduz.
‘Biziminez’ filma, bihar
Bestelakoa izango da biharko saioa. Biziminez pelikula jarriko dute, Josu Iztuetarena, arratsaldeko 19:30etan Biterin.
Filmak kontatzen ditu, bi lagunek Estatu Batuetako errepideetan zehar egindako bidaia baten oroitzapen eta bizipenak. «Errepideko zeharkaldia bera baino, garrantzitsuagoa da barne bidaia: oroitzapen eta bizipen eder eta ez hain ederrak, jolasak, eta bidean aurkitutako oztopoak, negarrez eta umorez gaindituko dituztenak. Bizitzari buruzko gogoeta sakona da, bi adiskideren erretratu zintzoa, bizimina transmititzen duen road movie hunkigarria», aurreratu dute.