Berezia izan da aurreko asteburua, Kantuz abesbatzako kideentzat. Irteera egin zuten Arabako Errioxara, asteburupasa, «gure kantuak bertakoei eskaintzeko». Baina kantari bakarrik ez, bisitari ere aritu ziren, Laguardian eta Bastidan.
Larunbatean abiatu ziren Hernanitik, Laguardiara bidean. Eta bertako San Joan elizan, Pilareko Ama Birjinaren kaperan eskaini zuten emanaldia: «harrera ederra izan genuen, eta baita gogotsu kantatu ere», adierazi dute.
Eta han zeudela aprobetxatuz... «Ez genuen denborarik galdu, eta bisita egin genion herri eder horri». Hango upategi batera ere jo zuten gero, «bertako ardo goxoak probatzeko», kontatu dute.
Han pasa zuten gaua ere, eta hurrengo egunean, igandearekin, Bastidako herrira egin zuten bisita. Herria ikusi, eta bazkari eder baten bueltan borobildu zuten asteburua, etxera bueltatu aurretik.