Urtebeteko erronka izan zen Baietz Hernanik!, Euskara Ari Du taldeak martxan jarri zuena, herrian euskeraren erabilera indartu eta areagotzeko. Eta erronkak eman zuenaren inguruan, liburua idatzi du Amagoia Mujika Telleriak.
Liburua argitaratu berri du Dobera Euskara Elkarteak, eta aurkezteko, gaur jarri dute zita. Biterin izango da, arratsaldeko 19:00etan hasita.
Egilea bera izango da aurkezpenean, eta liburuari buruzko azalpenak emango ditu. Bertan egongo dira, baita ere, liburuan azaltzen diren zenbait erronkalari, eta beraien esperientzia kontatuko dute, aurkezpen ekitaldian.
Izan ere, Baietz Hernanik! ekimenak eman zuenaz gain, erronkan parte hartu zuten hainbat herritarren esperientziak ere bildu ditu Mujikak.
Liburu bana, bertaratuei
Herritar guztiei luzatu diete gonbitea, aurkezpenera gerturatzeko; eta bertaratzen direnek, liburuaren ale bana jasoko dute, doan.