Orain urte batzuk jarri zuten, gaztain postu tradizionalak ez galtzeko helburuarekin, Plaza Berriko egurrezko etxola. Baina gaztainak saltzeko bakarrik ez, beste zeregin baterako ere baliatu dute txokoa, maiatzetik hona: liburuak eta aldizkariak trukatzeko gunea izan da, Europa mailan zabaldutako Liburuak kalera ekimenarekin bat eginez.
Udaberrirako eta udarako ekimena izan da liburu eta aldizkariena; eta orain, udazkena iristearekin batera, berriro hartuko dute gaztainek, liburu eta aldizkarien tokia. Izan ere, Kaxko elkarteak aurreratu du, laster hasiko direla berriro gaztainak saltzen, postuan.
«Hernaniko bizilagunei jakinarazi nahi diegu, udazkenarekin bueltatuko garela, inprimatutako paperarekin egindako kukurutxoekin, gaztain errez beteta; berriro ere zikintzeko eskuak, betiko plazerekin», nabarmendu dute elkartetik.
Hori horrela, bertatik kenduko dituzte liburu eta aldizkariak, oraingoz behintzat. Proba modura jarri zuten martxan Liburuak kalera ekimena, aurtengo udaberrian; baina litekeena da, gaztain denboraldia bukatu eta berriro udaberrian sartzean, liburu bidaiariak postura bueltatzea, trukaketarako gunean: «zuk irakurtzen duzuna, interesgarria da gainerakoek ere irakurtzeko», diote.