Segida izango dute gaur, komikiei buruzko solasaldiek, Hernaniko udal liburutegian. Eta oraingoan, Josean Olaberen Zigorgabeko loria komikiari buruz ariko dira. Iluntzeko 20:00etan hasita, Alai Zubimendik gidatuko du saioa, eta bertan izango da komikiaren egilea bera ere. Gipuzkoako historiaren zati bat eraman du komikira, Olabek. 1813ko Donostian dago kokatuta. Bukatzear da Napoleonen okupazioaren garaia penintsulan: gerrilak eta armada espainiarrak, indar britainiarrek eta portugaldarrek lagunduta, atzera daramakite Joseph Bonaparteren gobernua, mugarantz. Han dago zain Donostia, han dago zain loria...