Atzo hasi ziren Txantxilla auzoko jaiak, eta gaur izango dute bigarren eguna, nagusia.
Adin tarte guztietako herritarrek izango dute aukera, gaurko festa egunaz gozatzeko, horretaz arduratu baita Txantxilla Auzo Elkarteko festa batzordea, egitarau zabala eta anitza prestatuz.
Goizean goizetik, Musika Eskolako txistularien Dianak girotuko du auzoa; eta jarraian abiatuko dira, Txantxilla-Santa Barbara-Txantxilla kroseko partehartzaileak. Haurrek ere izango dute parte hartzeko aukera, beren mailako krosean, eta baita antolatu diren bestelako jolasetan aritzekoa ere.
Eguerdi aldera, sagardo dastaketa eta pintxoak izango dira, auzora bertaratzen diren guztientzat; eta ondoren, auzotarren bazkaria egingo da.
Arratsaldean, helduentzat toka txapelketa antolatu dute; eta haurrentzako, aldiz, Txoriburu izeneko ikuskizuna. Txokolatadaz gozatuko dute, ikuskizunaren ondoren. Eta segidan izango da, auzotarrentzat hain kuttuna den Arimen Kalejira, Hernaniko dultzaineroekin.
Jan-edanarekin eta dantzan borobilduko dute eguna: pintxopotea izango da, Gozo-gozo taldearen erromeriarekin batera. Eta gaueko 23:00etan jaiei bukaera emateko traka leherraraziko badute ere, nahi duenak aukera izango du, festa giroan murgilduta jarraitzeko, disko jartzailearen erritmora.
Krosak, zazpigarren edizioa
Zazpigarren edizioa izango du gaurko, festetan jokatzen den krosak. Goizeko 10:30etan abiatuko da, Txantxillako plazatik; eta 6,3 kilometro osatu beharko dituzte korrikalariek, baina ez dira errazak izango: Santa Barbarako ermitara igo beharko dute, berriro Txantxillako plazara jaitsi aurretik. Dutxak eta aldagelak eskura izango dira kiroldegian, bukaeran.
Sari ugari zozketatuko dira partehartzaile guztien artean, eta gaur bertan ere izena eman daiteke 7 euroan, irteeran.
TXANTXILLAKO JAIAK
GAUR, larunbata
- 09:00, Diana Hernani Musika Eskolako txistulariekin.
- 10:30, Txantxilla-Santa Barbara-Txantxilla VII. Krosa (ermitara igo eta jaitsi). Izena emateko aukera izango da probaren aurretik ere, 7 euroan.
- 11:30, Haur jolasak eta haurren krosa.
- 12:00, Sagardo dastaketa eta pintxoak.
- 14:30, Auzotarren bazkaria
- 17:00, Helduen toka txapelketa.
- 17:00, ‘Txoriburu’ haurrentzako ikuskizuna
- 18:00, Txokolatada
- 19:00, Arimen kalejira, Hernaniko dultzaina taldekoekin.
- 20:00, Pintxo potea, eta Gozo-gozo taldearekin erromeria.
- 23:00, Festen amaierako traka, eta jarraitu nahi duenarentzako disko jartzailea.
