Puzgarriak jarriko dira Txantxillan gaur, 17:00etan, jai-giroa berotzeko, eta 19:00etan emango zaie hasiera festei, txupinazoarekin. Maialen Lujanbio eta Unai Agirrek girotuko dute. Jarrraian, pintxo potea egingo da, eta 20:00etan Burrunba Elektrotxarangak joko du.
Auzo bazkarirako txartelak eta Kroserako izena, aukeran
Bihar ere denetik izango da; besteak beste, auzotarren bazkaria, 14:30etan, eta Txantxilla-Santa Barbara-Txantxilla VII. Krosa, 10:30etan.
Bazkaritarako txartelak erosteko azken eguna da gaurkoa; 8 euroan daude salgai, Aroza eta Txantxilla tabernetan. Kroserako, berriz, www.herrikrosa.eus webgunean eman daiteke izena, 5 euroan, edo bihar bertan, lasterketa hasi aurretik, 7 euroan. Sari ugari izango direla aurreratu dute.
Eguna bihar Musika Eskolako txistulariekin hasiko da, eta helduen krosaz gain, umeena ere egingo da; baita jolasak ere. Era berean, sagardo dastaketa, toka txapelketa, umeentzako ikuskizuna... izango dira.