Aurkezpen jaia ospatu zuen Hernani Eskubaloi Taldeak larunbatean eta dena ezin hobeto irten zen. Eguraldiaren beldur ziren antolatzaileak euriaren iragarpenarekin, baina zorionez dena biltzen ari zirela hasi zuen, behin jaialdia amaitu eta gero.
Aurten jaiaren lekua aldatu behar izan zuten Atsegindegitik Tilosetara eta eguraldiak bat egin zuen jaia aurrera eraman ahal izateko. Egunean zehar eguraldi atsegina izan zen, euririk gabe gauera arte, eta horrek aukera eman zion klubari egitaraua oso-osorik betetzeko eta jarri zuten helburua betetzeko. Eskubaloia kalera irten eta ezagutarazteko modu atsegina.
Goizean, hamaikak aldera lehenengo Street Handball txapelketari hasiera eman zitzaion. Frontoian kaleko eskubaloirako bi pista berezi jarri ziren eta bertan aritu ziren parte hartzaileak lauko talde mistotan antolatuta. Oso giro polita eta animatua sortu zen.
Ondoren, denboraldi honetan arituko diren taldeen aurkezpena izan zen eta segidan, lagunarteko bazkaria. Bertan, 200 lagun inguru elkartu ziren.
Arratsaldean, zazpi metrotik jaurtiketa lehiaketak, Street Handball txapelketaren finalek, sari banaketak, bingoak eta dj Kris Cle-ren musikak borobildu zuen jaialdia.
Baina partiduak ere izan ziren asteburuan eta jubenil nesken One Telecom-ek ezin izan zuen garaipena lortu Orion 33-29 galduta. Mutilek atsedena izan zuten.