Aspaldiko partez dauka senior mailako taldea, Hernaniko boleibolak, nesketan zein mutiletan. Asteburu honetan izan dute debuta bi taldeek; eta ezin hobeto hasi dute, ibilbide berria.
Larunbat arratsaldean izan zuten partidua biek, Hernaniko kiroldegian, elkarren segidan. Mutilena izan zen aurrenekoa, Euskadiko Ligakoa, Bera Bera talde donostiarraren kontrakoa. Oso urduri ekin zioten hernaniarrek, eta akats ugari pilatu zituzten; baina hala ere, aurreneko jokoa irabaztea lortu zuten (25-22). Lasaitasuna eman zien horrek, eta bigarrenean, ondo arituta, errazago nagusitu ziren (25-11). Horrela, aulkian zeuden jokalari guztiak atera zituzten kantxara hirugarrenean, eta hori ere irabazi zuten (25-20).
Segidan jokatu zuten neskek, Gipuzkoako Hasierako Txapelketakoa, Goierriren kontra. Eta borobila izan zen, haien partidua ere. Urduritasuna nabaritu zitzaien arren, kontrolpean izan zuten partidua uneoro, eta hiru jokoak irabazi zituzten: 25-16, 25-14 eta 25-9.
Neska kadeteen bigarren taldeak ere, irabazi
Baina senior mailako taldeek bakarrik ez, gainerako mailetakoek ere asteburu honetan hasi dute, Gipuzkoako Txapelketa. Kadeteetan, nesken bi taldeek egin zuten debuta, baina oso bestelako emaitzekin. Aurreneko taldea Donostian aritu zen, Pio Baroja kiroldegian, Fortunaren kontra; eta 3-0 nagusitu zitzaizkien donostiarrak. Bigarren taldeak, berriz, Hernaniko kiroldegian jokatu zuen, Summa Aldapeta 1 taldearen kontra; eta 3-0 nagusitu ziren. Oraindik hobetzeko asko dagoela adierazi dute taldetik, hala ere.
Eta azkenik, Tolosan aritu zen neska infantilen aurreneko taldea. Hernanin jokatu behar zuten berez, Laskorainen kontra; baina tolosarrek mesedea eskatu, eta haien kantxan aritu ziren azkenean. Eta 3-1 galdu arren, «partidu egokia» jokatu zuten hernaniarrek, «kontutan hartuta lehenengo mailako infantilak direla, eta lehenengo partidua zela».