Bertsotan jarriko dute Iparragirre Sagardotegia gaur iluntzean Eñaut eta Unai Agirre anaiek; Osiñaga Auzo Elkarteak eta sagargotegiak berak antolatuta, bertan izango baitira Auskalo zeinek jarriak emanaldiarekin afaria girotzen. Iluntzeko 20:00etan hasita izango da, eta txartel guztiak salduta, 120 lagun elkartuko dira afari girotuan.
Bertso historikoak eta gaur egungoak, tartean
Bertso jarriak izango dira protagonista nagusia: «Aldarrikatu nahi dugu bertso jarria eta bat-batekoa eskutik helduta joan direla, hau da, bat bateko jardunaz aparte, bertsolariek beti jarri dituztela bertsoak. Nahiz eta azkenaldian ez duen hainbesteko pixurik izan, gaur egunean ere oso formatu baliagarria da, eta badauka bere indarra», onartzen du Eñaut Agirre bertsolariak.
Aldea, baina, egileak eta tematikak markatuko dute: «denetarik izango da, bertso historikoak, baita gaur egungoak ere», azaldu du Agirrek.
Tartean izango dira XIX. mendeko Xenpelar osaba-iloben bertsoak, hau da, Juan Frantzisko Petriarena Rekondorenak eta Joxepa Antoni Aranberri Petriarenarenak eskainiko dituzte; eta baita gaur egungo Unai Agirre berarenak ere.
Tematika aldetik ere, denetarik entzun ahal izango dute bertaratzen direnek: Euskal Herriko historia isladatzen dutenak, edo gai sozialagoak lantzen dituztenak, besteak beste.
‘A capella’ kantatuko dituzte horiek guztiak, Eñaut eta Unai Agirreren artean txandaka, baita biak batera ere.
Lekuan lekuko bertsoak ere bai
Emanaldiak bi zati dauzkala azaldu du Agirrek: «zati bat berdina da emanaldi guztietan, eta beste zati bat lekuan lekura egokitzen dugu». Osiñagako kasuan ere hala izango da: «saiatu gara bertako bertsolarien sailak ekartzen, ez direnak oso ezagunak, baina oso onak direnak». Horrez gain «sorpresatxoren bat» ere izango dela aurreratu du.
Gabonetan, beste emanaldi bat
Ez da, ordea, haien herrian Auskalo zeinek jarriak emanaldia aurkeztuko duten azkeneko aldia izango. Afariaren bueltan egingo dutena, oholtza gainera eramango dute Eñaut eta Unai Agirre anaiek abenduan, Bertso Lataren barruan, Dobera Euskara Elkartearen alde. Laster emango da emanaldi honen xehetasun gehiago.