DENBORALDI berriaren aurkezpena egingo du gaur Hernani Eskubaloi Taldeak eta azken urteotan egutegian txertatuta geratu den zita da. Aurten, Atsegindegin egiten ari diren lanak direla eta, jaia Tilosetan ospatuko da goizeko 10:30etatik aurrera eta bertan, besteak beste, 19-20 denboraldian parte hartuko duten taldeen aurkezpena egingo da. Eguraldiak ez badu laguntzen, eta iragarpenak ez dira onak, Urumea Ikastolako jolastokira pasako da jaialdia.
Goizeko 10:30etan hasita Street Handball txapelketa ospatuko du klubak edo taldetik dioten bezala jokatu, lagunarteko lehiaketa kutxua izango baitu. Ondoren, denboraldi berrian arituko diren taldeen aurkezpenaren ondoren, lagunarteko bazkaria izango da. Arratsaldean txapelketaren finalak eta eguna biribiltzeko musika izango da, oraingoan Dj Kris Cle-rekin.
Eskubaloia hazten ari da Hernanin eta horren adierazle da, aurten Eskubaloi Eskolaz gain, beste zortzi taldek hartuko dutela parte eskubaloi denboraldian eta horiek aurkeztuko dira 13:00etan. Hiru infantil: Sesa Tools (neskak) eta Leoka eta Goizargi (mutilak); hiru kadete: Alaia (neskak) eta Sorlan eta Akola (mutilak); eta bi jubenil: One Telecom (neskak) eta Anexo (mutilak).
‘Street handball’, eskubaloia kalera ateratzeko helburua
Aurkezpen Jaiaren barruan street handball txapelketa ospatuko du HETak. Partidak goizeko 10:30etan hasiko dira Tilosetan (eguraldi txarra egin ezkero Urumean), eta finalak arratsaldeko 16:30etan izango dira. Bi kategoria bereiziko dituzte: Alebinak gehi infantilak alde batetik eta kadeteak gehi jubenilak bestetik. Taldeak mistoak izango dira eta lau jokalarik osatuko dituzte.
Honen helburua eskubaloia herrira hurbiltzea eta «ikustaraztea da» dio Ramon Iriondo taldeko arduradunak. «Iazko jaialdiarekin alderatuta pauso bat gehiago ematea da helburua eta horregatik antolatu dugu street handball txapelketa. Eskubaloia kalera ateratzea nahi dugu eta Tiloseta leku ezin hobeagoa da horretarako. Eguraldiak ez badu laguntzen Urumean egingo da murriztua. Atsegindegi itxita egotearen ondorioz pentsatu dugu txapelketa hau antolatzea».
Taldeko jokalariek izena emango dute eta kopuruaren arabera egingo dituzte taldeak egunean bertan ahalik eta parekatuen. «Goizean sailkapen fasea jokatuko da eta bazkalondoren finalaurdenak, finalaurrekoak eta azkenean finalak. Helburua nagusi eskubaloia kalera ateratzea da».
Zortzi talde eta 100 jokalaritik gora
Aurten taldeen kopurua igo egin da, zortzi guztira eta horrek suposatzen du neska-mutil gehiago dabiltzala Hernanin eskubaloian jokatzen. Mikel Ostolaza kirol arduradunetako batek dio «100 jokalari baino gehiago ditugu jadanik». Horrek futbola eta errugbiaren ondoren, kopuru haundiena duen taldea bihurtzen du HET.
Eskubaloian ere, neskek bertan behera uzten dutela adinean aurrera joaten diren heinean gertatzen da. «Jubeniletara gutxi iristen dira eta aurten oso nabaria izan da. Infantiletan asko dira neska eta mutilak, baina jubeniletara mutil gehiago iristen dira. Pena da talde kiroletan zailtasunak izatea nesken taldeak osatzeko. Askotan bost-sei neska badituzu jarraitzeko gogoekin, baina taldea ezin osatu geratzen dira, eta jarraitu nahi dutenak ere, ezin jokatu geratzen dira».
Eskubaloia Hernanin berreskuratu zela zazpi urte bete dira. «Kirol eskolan hasi ginen, gero infantil taldea osatu genuen eta pixkana hazten joan gara. Orain jubeniletan bigarren urtean daudenak hasi ziren».
Aurreneko urtean, normala den bezala, jendearen uholdea eduki zuten, eta orain taldea egonkortu egin da. «Eskolan orain ez ditugu hainbeste gazte, baina bai beste maila guztietan».
Ramon Iriondok dio «egitura sendotu egin da». Mikelek dion moduan «elkarte modura. Entrenatzaileak bolondresak gara, konpromezu haundi batekin. Ez da erraza eta antolakuntzak gauza asko eskatzen ditu eta horrek sendotasuna hartu du eta jarraitzeko ilusioa pizten dizu aurrera jarraitzeko».
Senior taldea osatzea, helburu
Taldea epeak betetzen ari da, eta aurrera begira, Hernanik berriz ere nagusien mailan taldea edukitzea da hurrengo helburua; baina posible ez bada, lanean jarraituko dute gazteekin. «Aurtengoa beste pauso bat da. Hemendik bi-hiru urtera gehienez gustatuko litzaiguke senior taldeak edukitzea bai nesketan eta bai mutiletan».
Horretarako ikusi egin behar da taldea nola garatzen den, zeintzuk jarraitzen duten, nortzuk doazen kanpora ikastera eta abar. «Beste ziklo bat hasten da eta askok beste bideak hartzen dituzte. Datorren urtean nahiko jende badago aterako dugu, baina ez bada posible datorren senior izango diren jubenil horiek jubeniletan mantendu beharko ditugu. Federakuntzak ematen du aukera hori gertatzen den fenomeno bat delako Gipuzkoako talde askotan. Eta hori kontuan izanda gure lurraldean eskubaloiak indar haundia duela eta beherakada baten ondoren azken urteetan berriz gorantz datorrela».
Aurkezpen Jaia-Gaur
|
*Partidak goizeko 10:30etan hasiko dira Tilosetan, eta finalak arratsaldeko 16:30etan izango dira. Bi kategoria bereiziko dira: Alebinak+Infantilak alde batetik eta Kadeteak+Jubenilak bestetik. Taldeak mistoak izango dira eta lau jokalarik osatuko dituzte. Euria egin ezkero jaialdia Urumea ikastolara pasako da. |