Aurreko asteburuan atseden hartu ondoren, lehiara bueltatuko da Hernani bihar, mutilen Ohorezko Mailan. Eta partidu zaila daukate, eguerdiko 12:00etan hasita: Santboiana indarberrituaren zelaian ariko dira, Baldiri Aleun.
Joan den urtean play-offetik kanpo geratu ondoren, indartsu hasi du denboraldia, talde kataluniarrak; eta jokatutako lau partiduetatik hiru irabazi ditu; horietako bat, Quesosi.
Trikoloreek, berriz, ez dute garaipenik lortu oraindik, Cisneros eta Independienteren kontra oso gertu egon arren. Zaila izango da biharkoan eskuratzea aurreneko garaipen hori, baina punturen bat ekartzen saiatuko dira behintzat, Santanderren erakutsitako maila onari segida emanda.
Erik Goñi, ‘sevens’ selekzioarekin Kenian
Baldiri Aleun arituko ez dena, Erik Goñi izango da. Espainiako zazpiko errugbiko selekzioak deitu du trikolorea, eta Kenian da egun hauetan, Nairobiko Nazioarteko Txapelketa lehiatzeko, gaur eta bihar.
Asteburu honetan Landaren ariko direnak, Euskal Ligako neskak dira. Gaur jokatuko du Landarbaso taldeak, arratsaldeko 16:00etan hasita, Getxoren kontra, ligako hirugarren jardunaldian. Landarera jaitsi eta animatzeko deia luzatu die taldeak, hernaniarrei.
Barneratzaileko taldeak, lagunartekoa Valladoliden
Bestalde, errugbi barneratzaileko taldeak zita berezia dauka asteburu honetan. Valladolidera egingo dute bidaia, eta topaketa izango dute Fuente de La Mora zelaian, El Salvador taldearekin, gaur goizean. Aurrena, 10:00etan, bi taldeen aurkezpena egingo dute. Eta ondoren, lagunartekoa jokatuko dute, baina nahastuta ariko dira bi taldeetakoak, harremanak estutzeko asmoz.
Gazteek zita bihar, Gravesend eta Ordiziarekin
Beste zita berezi bat ere izango da, Landaren, bihar eguerdian. Lau partidu antolatu dituzte, 17 eta 18 urtez azpiko taldeentzat, Hernani, Ordizia eta Ingalaterrako Gravesend taldeekin. Maila bakoitzean, gainera, bina talde osatuko ditu Gravesendek, bertan jokatzeko.
Eguerdiko 12:00etan hasiko dira bi partidu: 18 urtez azpikoetan Gravesend eta Hernani, eta 17 urtez azpikoetan Gravesend eta Ordizia. Eta 13:00etan hasita, alderantziz: 17 urtez azpikoetan Gravesend eta Hernani, eta 18 urtez azpikoetan Gravesend eta Ordizia.