Deialdia zabaldu du Hernani Aire Garbia plataformak, herriko usainekin eta arnasketa arazoekin lotuta egin den salaketa baten berri eman, eta egon litezkeen kasu berriak ezagutu ahal izateko. Bi bilera deitu ditu horretarako. Aurrenekoa gaur izango da, arratsaldeko 19:00etan hasita, Biterin. Hurrengoa, berriz, urriaren 29an izango da, 19:00etan Biterin, baita ere.
«Kasu gehiago baleude, ezagutu egin nahi genituzke»
Hernani Aire Garbiak azaldu du taldeko kide batek salaketa jarri duela, batetik, Hernaniko Udalean; bestetik, Osasun eta Ingurumen Sailean; eta, azkenik, Eusko Jaurlaritzan, «arnasketa arazoengatik, azkenaldian ohi baino nabarmenagoak diren usainak eztarrian sartu eta azufre zaporea uzten dutenez, arnasketa krisia izan zuelako». Hori horrela, «inguruko industriekin lotutako arnasketa arazoak medio salaketaren bat jarri nahi dutenei harremanetan jartzeko» eskatu die Plataformak. «Kasu gehiago baleude, ezagutu egin nahi genituzke, aspaldidanik sufritzen dugun arazoari, eta okerrera egiten ari denari konponbidea bilatzen saiatzeko».