Jokin Urretabizkaia Basozabalek erraz irabazi zuen Jon Larrañaga Larraren aurkako apustua, Jauregi jatetexeko belardian. Irabazleak 1.238 kilo ebaki zituen eta galtzaileak 865 kilo, 373 kiloren aldea. Ikuskizuna bai, jende asko ere bai ikusten, 700 inguru, baina emozioa falta izan zitzaion desafioari.
Honela, Basozabalek guztira 6.000 euro irabazi ditu, 3.000 euro alde bakoitzeko, eta Larra baino gehiago dela erakutsi zuen.
Gainera, hasieratik bukaeraraino nagusitu zitzaion. Aizkoran berdintasun gehiago egongo zela espero zen, baina lehenengo enborretik abantaila haundia atera zuen donostiarrak. Zortzi kanaerdiko moztu behar zituzten eta lehenengoan bi minutu t?erditik gorako abantaila lortu zuen 20 urteko gazteak.
Hurrengo enborretan bentaja gorantza joan zen egur guztietan. Aizkora lanak 31 minutu eta 45 segundotan amaitu zituen Basozabalek eta 40:42an 51 urteko Larrak.
Sail bat baino gehiagoren aldea
Ordurako donostiarrak sail erdia baino gehiago moztua zuen. Hernanin bizi den oiartzuarrak sentsazio hobeak transmititu zituen segan, baina hemen ere abantailak goraka egin zuen. Ordubete eta laurden igaro zirenean eta epaileak amaitzeko txistu soinua jo zuenean bien arteko aldea sail bat pasea zen. Gero kilotan ere alde hori nabarmen geratu zen.