Ohi bezala, Portu Eguna ospatzeko zita jarri dute gaur, auzotarrek. Eguerdian elkartuko dira, auzotarren arteko patata tortilla lehiaketarekin; baina noski, lehenago hasi beharko dute tortillak prestatzen! Eginda eraman beharko dituzte, etxetik, eta 12:00etan entregatu.
Orduan irekiko dute, epaimahaikideen deliberaziorako tartea, eta 13:00etan izango da sari banaketa. Bi tortilla goxoenak egiten dituztenek jasoko dute saria, aurten ere: aurrenekoak, bi lagunentzako bazkaria Fagollaga jatetxean; eta bigarrenak ere bi lagunentzako bazkaria, baina Errioguardan.
Auzo bazkaria eta erromeria, auzotarrak elkartzeko
Txapelketako tortillekin egingo dute hamaiketakoa gero, auzo bazkariari bidea egiteko. Eguerdiko 14:30etan izango da bazkaria, eta aldez aurretik erosi behar ziren tiketak.
Bazkaritan piztutako giroak, arratsaldean izango du segida, Bide Batez taldearen erromeriarekin denak dantzan jarrita.
Auzotar guztiak gonbitatu ditu Portuko Auzo Elkarteak, animatu eta parte hartzera.
GAUR, Portu auzoan
12:00, Auzotarren arteko patata tortilla txapelketa. Etxetik eginda eraman beharko dira.
13:00, Tortilla txapelketaren irabazleei sari banaketa: 1go saria, bi lagunentzako bazkaria, Fagollaga jatetxean; bigarren saria, bi lagunentzako bazkaria, Errioguarda jatetxean.
14:30, Auzo bazkaria. Tiketak aurrez erosi behar ziren.
18:30, Erromeria, Bide Batez taldearekin.