Asko ez, baina partidu batzuk jokatuko dira jai-eguna tarteko duen asteburu honetan. Beste batzuk astean zehar jokatu dira. Dena den, hainbat hitzordu dituzte bailarako pelotariek.
Zubimendi bihar, finalerdian
Txapelketa pribatuak dira asteburuan jokatuko diren asko, eta horietako bat da Aiheko Zubimendi hernaniarrak jokatuko duena. Bihar, Epelde azkoitiarra lagun duela, Irun Hiria Pala Txapelketako finalerdia jokatuko du, Irunen.
Aurkari izango dituzte Zabala eta Zumeta. Zubimendik ezagutzen du Zabala, Tilos 7 Pasa Txapelketako finalean elkarren kontra aritu baitziren. Hernaniarrak jantzi zuen txapela, Endika Ramosekin bikotea osatuta.
Etxean eta kanpoan, astigartarrak
Mundarroko pelotariak eskuz ariko dira asteburuan. Batetik, jubeniletan, Lizeaga anaiek gaur jokatuko dute, 11:00etan hasita, etxean. Tolosa izango dute aurrez aurre.
Bestetik, kadeteetan, Urdangarin eta Saralegik jokatuko dute, Tolosaren kontra, baita ere, baina bihar, 10:30etan, eta Beotibarren.
Hernaniar guztiak, kanpoan
Gipuzkoako Txapelketan ariko diren hernaniarrek kanpoan jokatuko dute. Nagusietan, Altuna eta Zugasti ere Tolosan ariko dira. Deskarga eta Alegria kadeteak, berriz, Loiolan.
Gainontzeko 6 partiduak Josetxo Ezkurra Txapelketan jokatuko dituzte, Iruritan, Amaiurren eta Elizondon.