Gipuzkoako Foru Aldundiko Kultura Sailak Ondarearen Europako Jardunaldiak antolatzen ditu, laugarren urtez, eta urte hontakoa Ondarea plazara! lelopean izango da.
Helburu nagusietako bat, ondarearen garrantzia balioestea eta herritarrei gerturatzea da. Ondarea jendaurrean erakustea, eta hau zaintzeko sentiberatasuna areagotzea, «kultur ondasunak tresna baliagarriak baitira, kultura kohesioa eta nortasuna indartzeko». Aurten gainera antolatzaileek «publikoari eskatuko zaio, esploratu ditzala, aisialdiak ondarearekin zerikusian dituen osagai ukigarriak eta ukiezinak» azpimarratu dute.
Urte honetako jardunaldian, hainbat eta hainbat ekintza antolatu dira, jendeak gozatzeko asmotan, hala nola, ikuskizunak, bisita eta ibilbide gidatuak edo antzeztuak, jardunaldi edo lantegi gastro-kulturalak, erakusketa fisikoak eta birtualak, eta beste hainbat ekintza gehiago. Jolas tradizionaletan parte hartzeko aukera ere egongo da, bola txapelketa esaterako.
Jardunaldien helburuak
Lehenik eta behin, aisialdiari, kirolari, jolasari eta jaiari lotutako gure ondareak duen garrantzia nabarmendu nahi izan dute, eta hori da lehen helburua. Bigarrena, jolasa eta jaia, kulturaren arteko zubi gisa erabiltzea, eta hirugarrena, ondarea babesteko kontzientzia areagotzea.
62 jarduera eta 92 ekitaldi 32 herritan
62 ekintza eta 92 ekitaldi aurkeztu dira, Gipuzkoa osoko 32 udalerrietan egingo direnak hain zuzen. Eragile publiko nahiz pribatu askoren bitartez antolatu dira, «honela jendeak, egun batzuetan zehar, aurkera izan dezan ondarearekin zerikusia duten baliabide ugarietara iritxi eta ezagutzeko, ohikoa ez den modu batean gainera».
Bi jarduera, Astigarragan
32 herrietatik bi, Astigarraga eta Hernani dira. Astigarragan, bi ekitaldi egingo dira. Aurrenekoa tailerra izango da, familiarentzako txalaparta eta kirikoketa tailerra sagardoetxean. Urriaren 19an izango da, eguerdiko 12:00etan, Sagardoetxean. Txalaparta, Euskal Herrian ezaguna den musika eta kultur giroko musika tresna dela adierazi dute antolatzaileek. Eta kirikoketa ere, sagardogintzarekin lotuta dagoen musika intrumentua denez, aproposa ikusi dute, egutegian sartzeko. Tailer honetan, sagar muztioa antzinako moduan egingo da, eta lanak amaitutakoan, txalaparta eta kirikoketa tailerra egingo da musika tresna hauek nola jotzen diren ikasteko.
Astigarragan egingo den bigarren ekintza, Sagarra eta aisialdia: jolasak, dantza eta musika izango da, urriaren 27an antolatu da, goizeko 11:30etatik, eguerdiko 13:00etara. Petritegi Sagardotegian Ikuskizuna, euskeraz eta gaztelaniaz entzuteko aukera ere izango da bertan.
Petritegik, sagarra eta sagardoaren inguruan sortu eta aisialdiari lotuta dagoen ondarearen zati bat erakutsi nahi izan du, jolas tradizionalak, dantza eta musika izango direnak, hain zuzen. Egunean bertan, ate irekien jardunaldia egongo da, eta sagardogintza tradizionala ezagutzeko aukera paregabea egongo da. Hainbat ekintzaz gain, sorpresak ere egongo dira.
Hernanin ere, ekintza
Hernanin berriz, ekintza bat egingo da, urriaren 19an, goizeko 11:00etatik eguerdiko 13:00etara bitartean, Chillida Lekun. Beste aldea airearen eskultoreak eta Chillida ezagutzeko jarduera ludikoa. Jolasaren eta esperimentazioaren bitartez eskultorearen lanetara hurbiltzeko aukera ematen duen jarduera ludikoa proposatu da.
Azkenik, 32 herrietan egingo diren ekintzak, azaroaren 15ean amaituko dira. Beraz aukera dago parte hartzeko.