Sendotasuna ari da erakusten Hernani, defentsan, nesken Euskal Ligaren hasiera honetan: hiru gol besterik ez ditu jaso, aurreneko lau partiduetan. Baina joan den asteburura arte, ez zuen lortu estreinako garaipena. Eta horri segida eman nahi diote gaur, etxeko aurreneko garaipena lortuta.
Lakua hartuko dute txuri-berdeek, Zubipen, gaur eguerdiko 12:00etan. Sei punturekin dago talde arabarra, hernaniarrek baino bat gehiago. Baina galdu dituzten bi partiduetan, zazpi gol jaso dituzte; eta hori, defentsako sendotasuna mantentzearekin batera, baliatu beharko du Hernanik, bigarren garaipena lortzeko.
Zubipen daukate zita, baita ere, Liga Nazionaleko mutil jubenilek. Eta partidu zaila bezain erakargarria izango dute, gainera. Athletic liderraren kontra jokatuko dute, arratsaldeko 16:30etan hasita. Ez zuten nahi bezain ondo hasi denboraldia, hernaniarrek; baina azkeneko bi partiduetan lau puntu lortuta, bilbotarrei aurre egiteko gogoz zelairatuko dira gaur.
Mutilen talde nagusiak, Donostian eta Deban
Etxetik kanpo ariko dira, aldiz, bailarako mutilen talde nagusiak, gaur arratsaldean. Mundarrok Donostian jokatuko du, Erregional Preferenteen mailan; eta Deban ariko da Hernani, Ohorezko Erregionaletan.
Txuri-berdeak Amaikak Bat taldearen zelaian izango dira bisitari, Errotazarren, arratsaldeko 16:30etan hasita. Debako taldeak, etxean jokatutako bi partiduak irabazi ditu, baina Hernanik ez du galdu oraindik, etxetik kanpo; bat irabazi, eta bestea berdindu. Zazpina punturekin daude bi taldeak, sailkapenean: hirugarren Hernani, eta zortzigarren Amaikak Bat.
Konpromiso zaila daukate moreek ere, gaurko partiduan. Vasconia liderrari egingo diote bisita, Puion, 17:30etan hasita. Baina aurreko asteburuan, Hernaniren kontrako derbian, aurreneko garaipena lortu ondoren, aurrerapausoak ematen jarraitzeko gogoz joango dira astigartarrak, Donostiara. Talde gaztea izanik, mailari neurria hartzen jarraitu behar du Mundarrok, eta horretarako, lasaitasuna emango die, azkeneko hiru partiduetan bost puntu lortu izanak.
Bi derbi, gazteagoetan
Erregional Preferenteetan izan zen derbia, aurreko asteburuan; eta beste bi derbi jokatuko dituzte Hernanik eta Mundarrok, asteburu honetan, gazteagoetan; biak ere, Zarkumendegin izango dira.
Gaur eguerdian jokatuko da ohorezko mailako mutil jubenilen derbia, 12:00etan hasita; eta bihar goizean ohorezko mailako mutil infantilen artekoa, 10:00etatik aurrera.