Bi hilabeteko prestaketa lanak eta gero, iritsi da Jokin Urretabizkaia 'Basozabal' donostiarra (20 urte) eta Jon Larrañaga 'Larra' (51 urte) Hernanin bizi den oiartzuarraren arteko de-safioaren eguna. Bihar, Jauregi jatetxeko zelaian, eguerdiko 12:00etan jokatuko dute aizkora eta sega apustua. Abuztuaren 6an iritsi ziren akordiora Oianume jatetxean eta 3.000 euro jokatuko ditu bakoitzak. Santa Barbaran, San Inazioe-tako erakustaldia eta gero hasi zen mugimendua, eta dagoeneko, ez dago atzera bueltarik. Bi kirolariak prest dira apusturako.
Alde bakoitzak 3.000 euro jokatu ditu eta sarrera erdibana.
Egin beharreko lanak: lehenengo 8na kana-erdiko moztu beharko dituzte, eta, ondoren, segan 75 minutuko denbora bete arte ariko dira. Denbora horretan belar kilo gehien mozten duena izango da garaile. Biak ere sasoiko eta gogotsu agertu dira aurreko egunetan; urduri ere bai, asko baitago jokoan.
Gaztetasuna, eskarmentuaren aurka
Basozabalentzako lehenengo apustua da, ez ordea, Larrarentzako. Aurretik baditu jokatuak hainbat erronka. Hori bai, ez bihar jokatuko den ohiartzunarekin. Bai bata eta bai bestea aizkoran eta segan aritzen dira, eta aurten Basozabal Euskal Herriko txapelketan ere aritu da, segan. Aizkoran ere erakustaldietan aritu da. Larra gehiago da aizkolaria.
Apusturako egur guztiak Urretabizkaiak aurkeztuko ditu eta bien artean banatuko dira. Jokoa jokatzeko egunean, egur guztiak goizeko 08:30etarako aurkeztu beharko dira, eta 10:00etarako jokatzeko moduan jarri. Aizkolari bakoitzak bina laguntzaile izango ditu. Basozabalek, laguntzaile bezala, prestakuntzan, Gabriel Saralegi eta Juan Manuel Erasun izan ditu. Larrak, ordea, Iruntxiberri; eta Donato Larretxea ere alboan eduki du.
Aizkoran amaitu ondoren, jarraian, belar mozten hasiko dira bi kirolariak. Aizkorako lana bukatu eta segan hastean, laguntzaileetako bat ordezkatu ahal izango da hirugarren batekin. Segalari bakoitzak laguntzaile eta zorroztaile bana izango ditu.
Apustua amaitzen denean dopinaren kontrola pasatuko zaie eta norbaitek positibo emango balu, apustuko galtzaile izango litzateke. Biek positibo emango balute, ez legoke garailerik. Dopin kontrolaren emaitzak jaso arte, edota negatiboa balitz, agiri horrekin diruzainak libratuko dio aipatutako diru kopurua.