Bigarrenez antolatu du Gainditzenek, Tolosaldea-Goierriko pertsona gorren elkarteak, Desgaitasunei buruzko Zinemaldia. Asteazkenean aurkeztu zuten, Hernaniko Biteri kultur etxean; eta Biterin bertan, gaur zortzi hasiko da, datorren ostiralean. Urriaren 18tik 25era izango da, hamaika saiorekin; eta horietako hiru antolatu dituzte Hernanin.
Film eta dokumental luzeak zein laburrak, antzezlanak edota erakustaldiak eskainiko dituzte, eta saioen ondoren, solasaldiak ere egingo dituzte. «Proiekzio guztiek ikusaraziko dute, desgaitasunen bat duten kolektibo ezberdinen errealitatea, eta aukera emango digute, pertsona guztien eskubideak ezagutzeko», azaldu zuen Julian Rodriguezek, Gainditzen elkarteko presidenteak. Aurkezpenean, berarekin izan ziren Richard Oribe igerilari paralinpikoa, Javier de Aymerich entrenatzailearekin eta Ana Borrezo laguntzailearekin; Xabier Lertxundi Hernaniko alkatea; eta Andoni Lizeaga, Hernaniko errugbi inklusiboko ordezkaria.
?La niña pirata? eta ?Apnea? film laburrak, hasteko
Biteriko hiru saioetatik aurrenekoa, urriaren 18koa, arratsaldeko 19:00etan hasiko da, eta bi film labur jarriko dituzte: La niña pirata, Gabriel Lúgigok egindakoa; eta Apnea, Gabriel Flainena. 14 minutuko iraupena dauka La niña pirata filmak, eta Lucia da protagonista, zazpi urteko neska bat. Bere ama erizainarekin batera, tratamendu eta proba asko daramazki azkenaldian. Ama da beretzako eredu, baina ezusteko aldaketa batek, egoera berrira egokitzera behartuko du.
Apnea filma, berriz, izen bereko elkartean kokatzen da. Bertan, 95 urteko gizon bat ari da, aniztasun funtzionala duten haurrei eta haien familiei laguntzen. Osso izeneko metodologiaren sortzailea da bera. 18 minutuko iraupena dauka.
Lau film labur eta ?Pumpas? pelikula jarriko dituzte Biterin, hiru saiotan.
?Pumpas, abriendo caminos? filma, errugbi inklusiboaz
Urriaren 23an izango da bigarren saioa Biterin, eta errugbi inklusiboari buruzko pelikula bat jarriko dute, 19:00etan hasita: Pumpas, abriendo caminos. Rafael Ruizek zuzenduta, 87 minutuko iraupena dauka. Ezaugarri bereziekin sortutako aurreneko errugbi talde argentinarra da Pumpas XV, errendimendu altuko kiroletan desgaitasun intelektuala duten pertsonen partehartzea ahalbidetuz. Espero gabeko indarra hartuko du taldeak, jendearen laguntza eta konpromezuari esker; eta erakutsiko du, desgaitasunen bat dutenek errugbian jokatu dezaketen bezala, nahi duten guztia egin dezaketela: pazientzia eta denbora kontua besterik ez da.
Ondoren, solasaldia izango da, Hernaniko errugbi inklusiboko Andoni Lizeaga eta Jon Insaustirekin, eta Pumpas proiektuko David Izquierdorekin.
Bi film labur, sari banaketa eta gurpildun aulkian dantza erakustaldia, bukatzeko
Urriaren 25ean izango da azkeneko saioa Biterin, eta horrek emango dio bukaera, aurtengo Zinemaldiari. Arratsaldeko 19:00etan hasita, bi film labur jarriko dituzte, aurrena: Lés?Égarés, Maria Castillejok, Maëlle Gran Bossik eta Elisabeth Silveirok egindakoa; eta Don Chisciotte, Marta Rigo eta Giuseppe Zambonirena. Komedia bat da aurrenekoa, eta lapurreta bat kontatzen du, baina ez beldurgarria eta ez mingarria; maitasunari buruz hitz egiteko aitzakia besterik ez da. Eta Don Chisciotte filma, amets baten istorioa da, inklusioaren utopia. Don Quijote modernoaren abentura dibertigarriak kontatzen ditu filmak, eta ezgaitasunaren eta ezberdintasunen metafora eginez, bizitzaz eta inklusioaz hausnartzera eramango ditu ikusleak.
Bi film laburren ondoren, sari banaketaren gala egingo dute bertan; eta azkenik, dantza erakustaldia eskainiko dute, gurpildun aulkietan.
Biteriko saio guztietan, zeinu interpretea egongo da.
Andoainen, Urnietan, Tolosan, Donostian eta Errenterian izango dira, gainerako saioak. Informazio guztia, hemen.