Bihar izango du mendeurren festa haundia, Argia aldizkariak, Donostian. Baina hasiera emateko, gaur jarri dute zita, Trinitate Plazan: Napardeath film trilogia jarriko dute, gaueko 21:00etan hasita, Beñat Iturrioz hernaniarrak eta Xabier Padinek zuzendutakoa. Kalean izango da emanaldia, doakoa, eta bi ordu iraungo du.
Bihar, berriz, goizean hasiko da festa. Aurrena, Trinitate Plazatik abiatuta, Zomorro bila Urgullen ekimena antolatu dute, familian gozatzeko jolasa, Iñaki Sanz-Azkue biologo hernaniarrak eta Eñaut Aiertzaguena marrazkilariak gidatuta.
Ondoren, 12:00etan, ibilbide historikoa egingo dute kalez kale, Trinitate Plazan hasita; eta hernaniar batek gidatuko du, Urko Apaolazak, Deskolonizazioa gaitzat hartuta, Beñat Gaztelumendi eta Miren Artetxe bertsolarien laguntzaz.
Omenaldia, soka-dantzan
13:00etan, berriz, «une sinbolikoa» izango da, Konstituzio Plazan. Soka-dantza egingo dute, eta bi lagun omenduko dituzte: bata, Zeruko Argian ibilitako azkeneko belaunaldiko ordezkaria; eta bestea, Argian hasieratik kazetari aritu dena, eta Hernanin bizi dena.
Trinitate Plazako bazkariarekin, eta arratsaldeko pailazo, kontzertu eta txapelketekin izango du segida festak.
«Euskerazko hedabide batek mendea betetzea, bada herri oso baten lorpena, eta Argiaren kasuan, Hernaniko jendeak pisu haundia izan du lorpen horretan», nabarmendu dute.