Eztabaida Feministak antolatu ditu Gipuzkoako Jabetze Eskolen Sareak, hilabete honetarako: prostituzioari eta sexu-lanari buruzko jardunaldiak egingo dituzte.
Urola Garaiako mankomunitateak, eta Arrasate, Azpeitia, Eibar eta Hernaniko udalek osatzen dute sarea, eta hori horrela, hiru hitzaldi izango dira Hernanin, Biteri kultur etxean. «Gai konplexua izanik, alderdi ezberdinetako ahotsak ekarri nahi izan ditugu, ikuspegi feminista batetik, elkarrekin eztabaidatu eta hausnartzeko helburuz», azaldu dute.
Conxa Borrell, Amelia Tiganus eta Péter Szil, hizlari
Etzidamu, datorren astelehenean, izango da aurrenekoa, eta Conxa Borrell Bernausek eskainiko du, Otras sexu-langileen sindikatuaren idazkari nagusiak: Sexu-lana; lan eskubideak, sindikatzea eta esplotazioa.
Urriaren 22an, berriz, Amelia Tiganus ekintzaile feminista eta prostituzio sistemaren biziraulea izango da hizlari. Emakumeak eta neskak: prostituzioaren salgaiak. Nola egiten da bat puta? gaia izango du hizpide, Tiganusek.
Eta azkenik, hilaren 25ean, Péter Szil izango da Biterin, psikoterapeuta, hezitzailea eta indarkeria patriarkalari buruzko gaietan aktibista. Gizonak, pornografia eta prostituzioa gaia jorratuko du.
Arratsaldeko 18:30etan hasiko dira hitzaldi guztiak, eta gaztelaniaz izango dira.