Beldur Barik programak Beldur Barik Jarrera! lehiaketaren 10. edizioa antolatu du eta Hernaniko lehiaketak berriz laugarrena beteko du. Azaroaren 5era arte aurkeztu ahal izango dituzte lanak 12 eta 26 urte arteko gazteek. Sari nagusiaz gain, Hernanin beste bat banatuko da. Bestalde, urriaren 26an topaketa egingo da Biterin, 10:00etatik 13:00etara.
Martxan jarri da, laugarrenez Hernanin, Beldur Barik programa, Udalak, Berdintasun Kontseiluak, Arremanitzek, Gaztelekuak eta herriko hainbat eragile feministek bultzatuta. Horrela, ikus-entzunezkoen lehiaketa orokorraz gain, Hernanin ere sariak banatuko dira.
Indarkeria sexista prebenitzeko
Beldur Barik EAEko instituzioek bultzatutako programa da, indarkeria sexista prebenitzeko. Beldur Barik jarrera bultzatu nahi da gazteen artean, hainbat bide erabilita.
Horietako bat da ikus-entzunezkoen lehiaketa eta bestea lan grafikoak. Neska mutilek desberdintasun egoeren aurrean nola erantzuten duten erakutsi behar da lan horietan. Hiru minutukoak izango dira gehienez Youtube, Vimeo, Facebook, Instagram formatuan. Formatu grafikoak gehienez 5MB eta jpg formatua edukiko dute.
Aurtengo lehiaketan parte hartzeko epea irekita dago azaroaren 5era arte, eta oinarriak ikusi eta lanak aurkezteko beldurbarik.eus webgunera jo behar da. Hernaniko lehiaketan; 12-17 urte arteko eta 18-26 urte arteko kategorietan hartu daiteke parte (adin txikikoek baimena behar dute izena emateko) eta orokorrean berriz hiru kategoria daude: 12-13 urte artekoa, 14-18 urte artekoa eta 19-26 urte artekoa.
Hernanin, beste bat
Lehiaketa orokor horretako sariak azaroaren 23an banatuko dira Bizkaiko udalerri batean, eta bertara joateko autobusa jarriko da doan, Hernanitik (izena webgunean).
Baina Hernanin ere beste sari bat banatuko da kategoria bakoitzean, 150 eurokoa. Sari banaketa hori azaroaren 22an egingo da, 18:30etan Biterin.
Lehiaketa orokorrean saria potoloagoa da. Kategoria bakoitzeko irabazleari 400 euro banatuko zaizkio. 300 euroko sari berezia egongo da, baita partehartze saria, ere, 300 eurokoa.
Topaketa Hernanin, urriaren 26an
Horrez gain, urriaren 26an topaketa egingo da, 10:00etan Biterin. Autodefentsa feminista eta mutilei bideratutako maskulinitate berriak tailerra eskainiko dira. Topaketan izena emateko 679 756 824 telefonora deitu.