Urtero bezala, urriaren 31ra arte eskatu ahalko dira 2018ko Ondasun Higiezinen gaineko Zerga (etxebizitza) eta 2019ko hondakin bilketa eta ur-hornidura eta saneamendu tasa ordaintzeko dirulaguntzak.
Hernaniko Udalak duela bi hamarkada sortu zituen dirulaguntza hauek eta garai hartan aintzindaria izan zen. Horien helburua da diru sarrera txikiak dituzten familiei laguntzea, derrigorrezkoak diren zerga eta tasak ordaintzeko. Neurri horiek ezartzea zerga sistema solidario bat lortzeko norabidean urrats garrantzitsua da. Dirulaguntzak honakoak dira: OHZren kasuan %50eko edo %25eko deskontua, familia unitatearen diru-sarreren arabera. Tasen kasuan %100a edo %50a, familia unitatearen diru-sarreren arabera.
161 familiak jaso dituzte 2017ko dirulaguntzak
161 familiak jaso dituzte guztira 2017an eman ziren dirulaguntzak honela banatuta: Hondakinak, ur-hornidura eta saneamendu tasak ordaintzeko 93 familiak jaso dute dirulaguntza. 56 familiari itzuli zaie %100 eta 37ri, erdia. Guztira, 14.855 euro.
Ondasun Higiezinen gaineko Zerga (OHZ) ordaintzeko dirulaguntzak jaso dituzte 68 familiak; zergaren erdia itzuli zaie 42 familiari eta %25 26 familiari. Orotara, 6.019,9 euro.
Betebeharreko baldintzak Udalaren webgunean edo harrera zerbitzuan
Dirulaguntzak jasotzeko hainbat baldintza bete behar dira: Udalaren webgunean edo Herritarren Harrera Zerbitzuan (HHZ) eskuragai daude. Hemen baldintzetako batzuk:
Familia unitatearen diru-sarrerak: tramo ezberdinak daude familia unitateko kideen arabera. Ur kontsumoa: ezin da 45m3 pertsonako/urtean baino haundiagoa izan.
Etxebizitzaren katastroko balioa: ezin du 153 mila euro baino gehiagokoa izan. (168 mila euro familia ugarien kasuan). Bizikidetza unitateko ibilgailu bat baino gehiago ezin da izan. Bizikidetza unitateko kide guztiek Hernanin erroldatuta egon behar dute urtebetez gutxienez eta ezin dute zorrik izan Udalarekin.