Borobila izatetik gertu egon da asteburua, esku pelotari hernaniar eta astigartarrentzat. Markel Lizeagak denboraldiko bigarren txapela irabazi du. Ekain Lizeaga, berriz, final zortzirenetan da Bankoa-DV txapelketan, eta jaialdiko pelotari onenaren saria ere jaso du.
Aginagatik Hernanira, txapela
CD Hernaniko Markel Lizeagak Usurbilgo Pagazpe taldeko Xabier Santxo izan zuen bikote Aginagako Txapelketako finalean. Baina aurretik, CD Hernaniko Ioritz Arrietarekin aritu zen finalerdietako batean, eta 22 eta 10 irabazi zuten Maiz eta Arrateren kontra.
Finalerdietako bigarren partiduan Santxorekin aritu zen Lizeaga, eta 22 eta 14 irabazi zieten Loidi eta Salegiri. Finalean, bikotea mantendu eta Exposito astigartarra eta Alduntzin izan zituzten aurkari, eta partidu luze eta ona jokatu ondoren, azkenean,?Santxo eta Lizeagak irabazi zuten 22 eta 19. Horrela, txapela etxeratu zuen Lizeagak, CD Hernanik denboraldi honetan lortzen duen bigarrena; Lizeagak berak ekarriak, biak.
Txuleta, Astigarragara
Pelotari astigartarrei dagokienez, Ekain Lizeaga Bankoa-DV txapelketa jokatzen ari da, eta Urretxutik sari eta guzti itzuli da. Atzelari astigartarrak Hormaetxe aurrelari bizkaitarrarekin jokatu zuen, eta 7 eta 22 irabazi zuen, promesa mailan, Goikoetxea eta Ibañezen aurka.
Astigartarra bikain aritu zen, eta Ibañezek apenas izan zuen aukerarik ezer egiteko. Gainera, aurrean, Hormaetxeak ederki errematatu zituen tantoak. Horrela, Ekain Lizeagak jaialdiko pelotari onenaren saria ere irabazi zuen, eta txuleta ekarri zuen etxera, opari. Emaitza honekin, final zortzirenetara pasa da.
Gipuzkoakoan ere, ondo
Bestalde, Gipuzkoako Txapelketetan emaitza onak izan dira, orokorrean. Hernaniarrek 12 garaipen eta 3 porrot izan dituzte. Kadeteetan, Jara eta Etxarrik finalera sailkatzeko aukera mantendu dute. Deskarga eta Alegria kadeteek eta Oiartzabal eta Insausti II jubenilek ere irabazi egin dute, eta baita Salaberria-Insausti eta Arizmendi-Zugasti seniorrek ere. Azken hauek batere partidurik galdu gabe segitzen dute.
Lizeagak, bestalde, kasu honetan Exposito astigartarrarekin, ezin izan zuen Intxurreren kontra, nahiz eta finalerdietarako sailkatzeko aukera mantentzen duten.
Astigartarren artean, Aner Urdangarin eta Asier Saralegi kadeteek 22 eta 8 irabazi zioten Oiarperi, eta Lizeaga anaiek 13 eta 22, Mundarrori. Harri Loidi eta Jokin Santxez nagusiek, berriz, galdu egin zuten 20-22, Añorgaren aurrean.