Prest dauka Amher elkarteak, beste urte batez, Inmigrazinea, inmigrazioa eta zinea uztartzen dituen zikloa. Bost pelikula eskainiko dituzte aurten, eta etzidamu izango da aurrenekoa, 19:00etan hasita, Biterin: Cafarnaúm filma jarriko dute, Nadine Labakirena, Libanon kokatutakoa. Sarrera doakoa izango da.
Zain izeneko haurra da protagonista, 12 urteko mutiko azkar eta ausarta. Horri esker egiten die aurre, Beirut hiriko arriskuei. Bere gurasoengandik ihesi, eta bere eskubideak defendatzeko, auzitara eramango ditu, egindako krimenagatik: bera mundura ekartzeagatik. 126 minutuko iraupena dauka filmak, eta 2018an estreinatuta, makina bat sari eta izendapen jaso ditu.
Gaur egungo inmigrazioa hizpide, bost filmek
Aurrenekoa bezala, «kalitatezkoak eta saritutakoak» dira, jarriko dituzten beste lau pelikulak ere; eta guztiek landu nahi dute, «gaur egungo inmigrazioari buruzko irudia, ikuspegi moderno eta anitzaren bidez. Herrialde ezberdinetako errealitatea islatzen saiatzen dira», azaldu dute Amherretik.
Urriaren eta azaroaren bukaeran jarriko dituzte beste lau pelikulak: urriaren 24an, Frozen River edo Río Helado, Courtney Huntena; urriaren 31n La Jaula de Oro, Diego Quemada-Diezena; azaroaren 29an Diamantes Negros, Miguel Alcantudena; eta azaroaren 30ean El viaje de Nisha, Iram Haqena.
Guztiak izango dira Biterin, arratsaldeko 19:00etan; eta denetarako sarrera izango da irekia eta doakoa.
Jaialdi gastronomikoan lagundu zutenei, eskerrak
Bestalde, irailaren 29ko nazioarteko jaialdi gastronomikoaren balorazioa ere egin du Amherrek: «aurreko urteotan bezala, 20 herrialdek baino gehiagok eskaini zituzten beren gutiziak, eta herrialde ezberdinetako musika eta dantzak ikusteko aukera ere izan genuen. Afrika, Amerika, Asia eta Euskal Herriko janariak dastatuz, jaki guztiak agortu arte, 400 tiket inguru saldu ziren», nabarmendu du elkarteak.
Era berean, eskerrak eman nahi izan dizkiete, «gerturatu zineten guztioi, eta espero dugu, janari eta festa giroan bizi izan genuena, baliogarria izatea gure arteko elkarbizitza eta elkartasuna indartzeko».
Eta azkenik, eskertu nahi izan dute, «jaialdi hau antolatzeko jaso dugun laguntza: Gaztebizilagunak, Afrikaren aldeko aniztasuna, Urumea Herrigunea, Gizalde, Gipuzkoako Sos Arrazakeria, Santa Barbara elkartea, Eroski Center, Pak Eusko Doner Kebab, Kronika, Diario Vasco, Biteriko langileak, udal langileak, Atawafok, Goiz Eguzki abesbatza, Hernani Musika Eskolako gazteen trikitixa taldea, Unai Agirre eta Asier Azpiroz bertsolariak, eta Hernaniko Argazki Foruma».