Cisnerosen kontra bezala, gertu izan zuen aurreneko garaipena atzo, berriro, Hernanik. Emaitza berarekin, 21-20 madarikatuarekin, nagusitu zitzaion Independiente, Santanderren; eta defentsako bonusarekin bueltatu ziren trikoloreak.
Ez ziren gaizki hasi gauzak trikoloreentzat, bederatzi minututan estreinatu baitzuen markagailua Santi Muñozek, zigor kolpe batekin (0-3). Ez zuen luzaroan iraungo abantailak, hiru minutura aurreratu baitzen Independiente, entsaio batekin (7-3). Baina kolpe horrek indarra eman balie bezala, partiduaren jabetza hartu zuten hernaniarrek; eta 20garren minututik atsedenera, estu hartu zituzten kantabriarrak, haien indarrari atsedenik gabe eraso eginda, fase artean denbora galdu gabe. Eta 36garrenean iritsi zen saria: Iñaki Otxotorenak lortu zuen entsaioa, eta Muñozek transformatu, atsedenera aurretik iristeko (7-10).
Atsedenetik bueltan, ordea, Hernani ibili zen larriago. Trabatu egin zen partidua, eta bi entsaio lortu zituen Independientek, 53an eta 66an (21-10); baina etsi gabe jarraitu zuen Hernanik, hankaz gora jarri zuten kantabriarren lasaitasuna, bi entsaiorekin, Mattin Colladok eta Eric Goñik (21-20), lau minuturen faltan. Transformaziorik ezin izan zuten gauzatu, ordea; eta garaipenaren tokian, kontsolazio exkaxeko puntu bakarra jaso zuten.