Jarri du hurrengo data seinalatua bere egutegian, Xalaparta elkarteak. Sagardo lehiaketa egingo dute urriaren 26an, eta afarian parte hartzeko, dagoeneko zabalik dago izenematea. Elkartean bertan jarri dute zerrenda, eta 80 lagunentzat dago tokia. Plazak betetzean, itxi egingo dute.
Edizio borobila izango da aurtengoa, 25garrena; eta hamar sagardotegik hartuko dute parte: Altzueta, Itsasburu eta Zelaia hernaniarrak; Artola, Bereziartua, Lizeaga eta Oialume Zar astigartarrak; Andoaingo Gaztañaga; Urnietako Setien; eta Zubietako Astiazaran-Iruin.
Iluntzeko 20:30etan hasiko da afaria, eta 20:15etarako elkartean egotea eskatu dute.
22 lagun Aranora oinez, eta beste 20 bazkarirako
Joan den igandean ere, izan zuen ospakizunik, Xalapartak. Aranora martxa egin zuten, eta 22 lagun animatu ziren oinez, eguraldi ederra lagun. Beste 20, berriz, bazkarirako elkartu zitzaizkien Aranon, eta guztira, 42 lagunek bazkaldu zuten Kontsejun, giro ederrean.
Ohi bezala, gainera, toka txapelketa jokatu zuten bertan, eta Nekane Barral eta Jesus Rodriguez de la Fuente izan ziren txapeldunak.
Elkartetik oso pozik azaldu dira, martxak izandako «partehartze arrakastarekin».