Pelota buru belarri murgildu da dagoeneko txapelketa desberdinetan, nahiz eta txikienak oraindik ez diren hasi partiduak jokatzen, eta horren erakusle da Markel Lizeaga hernaniarraren egutegia.
Aste honetan hiru partidu jokatu ditu dagoeneko. Azkena atzo 19:00etan Expositorekin batera Ikaztegietan jokatu zuena Gipuzkoako Txapelketako, ohorezko mailan, Intxurreren kontra. Kronika ixterakoan partidua ez zen amaitu, baina bai astearte eta ostegunean bertan jokatu zituen beste bi. Egian, Arrieta herrikidearekin batera Espinal eta Gaskue gainditu zituzten 22-5, eta ostegunean, Santxo usurbildarrarekin batera, Exposito (Hernani) eta Alduntzin garaitu zituzten Aginagan. Aktibitate haundi honi beste pelotari astigartarren eta hernaniarren partiduak erantsi behar zaizkio.
Atzo ostiralean, hainbat partidu jokatu zituzten arratsaldez eta ilunabar aldean kadete, jubenil eta nagusien mailan. Emaitzak astearteko Kronikan emango dira, baina gaur eta bihar artean jokatuko dira partidu desberdinak.
Bihar igandean Oier Garaiar, Mattin Arluziaga eta Aiur Elizazu gazteak buruz buru ariko dira Lizarrako Torneo pribatuan.
Gaur, Iruritan Iturbe eta Azpeitiak, Oberenako bikotearen kontra jokatuko dute eta Txintxurreta eta Sagardia, Txapagainen aurka neurtuko dira Gartzaron.
Bi partidu, bihar goizez kiroldegiko frontoian
Txapelketa ofizialetan Hernanin bi partidu jokatuko dira bihar. 11:00etan Deskarga eta Alegria kadeteek, Tolosa izango dute aurrez aurre Gipuzkoako Txapelketan bigarren mailan. Ondoren, nagusien txanda izango da. Lehenengo mailako Urkizu eta Labakak, Gazteleku dute aurkari.
Gaur ere egongo da pelota partidu bat hernaniar ordezkariekin Gipuzkoako Txapelketan. Uitzi eta Apaolaza jubenilek Tolosan jokatuko dute, 17:00etatik aurrera.