Artisau garagardoa gero eta indar gehiago ari da hartzen Euskal Herrian eta beste herrialdeetan. Bailaran bertan ere baditugu adibideak Otsahien eta Basqueland Brewing. Artisau garagardoak garagardoak dira, gehigarririk eta kontserbagarririk gabeak eta pasteurizatu gabeak. Bizirik daude eta eboluzio-produktuak dira, egunero pixka bat aldatzen direnak, legamia bizia (ikusgai ala ez) daukate. Malta aleetatik hasita, urarekin, legamiarekin, lupuluarekin eta zerealekin batera, estrakturik erabili gabe, prozesu natural baten bidez sortzen dira.
Orain urte gutxira arte Euskal Herrian ez da ohiturarik izan artisau garagardo ekoiztu eta kontsumitzeko, nahiz eta Europan korronte honi gehitzen azkenetarikoa izan, indarrarekin sartu da artisau-garagardoaren munduan. Azkenetarikoa izate honek ere mesede egin dio, beste lekuetako esperientzietatik ikasteko balio izan die enpresa berriei. Benjamin Rozzi Basqueland Brewing Projecteko kidearen hitzetan. «Gutxinaka Munduan zehar goraka goaz eta erakutsi nahi dugu Euskal Herrian ere garagardoa badakigula egiten».
«Ekozile industrial batzuk bertakoak bailiran bezala saltzen dute eta ez da horrela. Sortzen dute nahasmena»
Otsaiheneko kideek ere argi dute. «Beste herrialde batzuetan aspaldi hasi ziren etxean garagardoa ekoizten: AEBetan, Belgikan, Alemanian... Katalunian ere hasi ziren, orain 10-15 urte. Euskal Herrian beti atzetik ibiltzen gara. Baina lehen ez zegoen interesa sumatzen da, Nafarroan asko egiten ari dira, Hernanin BBP ere badaukagu... Garagardo artisauaren merkatua txikia da oraindik, baina zabalduko da!».
Gauza berriak egiten, baita sagardotegiekin elkarlanean
Momenturo gauza berriak egiten dituzte Akarregin. Hilabetean hiru garagardo berri ateratzen dituzte. «Orain serie bat ari gara ateratzen australiar lupulu mota batekoa. Urteurren ekitaldian beste bi berri aterako ditugu eta gero gama finko bat dugu momenturo egiten ari garena. Aurreko urtean Zapiain sagardotegiarekin elkarlanean garagardo bat ekoizten hasi ginen. Muztioa gure fabrikan egiten dugu eta sagardotegira eramaten dugu ondoren bertako giroan irakiteko. Sagardoaren bakterioak daude airean eta irakiteko egokia da».
Aurten txakolindegi batzuekin saiatu dira elkarlan hori aurrera eramaten, baina ez da posible izan denbora faltagatik. «Berandu hasi ginen eta datorren urtera arte atzeratuko dugu elkarlana».
Estatu Batuetan eta Erresuma Batuan artisau garagardoak merkatu kuotaren %10 inguru dauka
Artisau garagardo kontsumitzaileak ez du aditua izan beharrik Rozziren esanetan. «Denentzako garagardoa egiten dugu. Batzuk oso zaleak dira eta beste asko ez. Hemen ?rubia? esaten zaion horren antzekoa ekoizten dugu, nahiz eta gure ezagunena IPA altuagokoa izan».
Garaian garaiko garagardoa egiten da artisau eran. «Saiatzen gara denboraldi bakoitzari egokitutako garagardoak egiten. Urrian, udazkenean gaude jadanik, eta urteurren egunean IPA bikoizten duen bat jarriko dugu martxan, zortzi gradutakoa. Hotzarekin garagardo sendoagoa edo mardulagoa egiten dugu. Udaran esaterako garagardo arinagoa ekoizten dugu». Estatu Batuetan hasi zen bide hau asko zabaldu da.
500 mila litro ekoiztuko ditu aurten Basqueland Brewing Projectek
Espainian garagardoaren urteko kontsumoa pertsonako (2015an). 40 litro ingurukoa zen, guztira 33.620.000 Hl ekoiztu zirelarik. Horietatik 100.000 Hl, gehienez, kontsideratzen ziren artisau garagardo bezala. Horrek esan nahi du kontsumitzen zenaren %0,3ko merkatu kuota zutela artisau-garagardotegiek. Euskal Herrian portzentai horiek motelagoak dira; Euskal Garagardo Elkarteak kalkulatzen du, garagardotegi txikiek, artisauek, %0,1ko merkatu kuota izango dutela .
Benjamin Rozzik inguruko merkatuaren inguruan hausnarketa egiten du. «Etengabeko borroka da marka industrial haundiekin. Ea gauzak aldatzen diren». Benjamin Rozzi gainera kexu da aspaldi honetan egiak ez diren mezuak zabaltzen direlako marka ezagun horien aldetik. «Bertakoak bezala saltzen dira eta ez da egia. Gure inguruan baditugu horren bi adibide ezagun. Ez dira hemen ekoizten, kanpoan baizik eta gero saltzerakoan hemengoak direla esaten dute. Ez da etikoa, enpresa haundi asko kontsumitzailea nahasten ari dira produktu lokala izango balitz bezala salduz».
«Garaian garaiko garagardoa egiten dugu. Hotza hastean sendoagoa eta udaran arinagoa»
«Artisau garagardo ekoizle askok beraien diru guztia inbertitzen dute lan horretan eta ekoizle haundiek berriz marka bat bakarrik egin dezakete kontsumitzailea nahasteko. Hori ikustea tristea da» aipatzen du Rozzik.
Hala ere baikor agertzen da eta goranzko bidea geldiezina dela dio. «Urtetik urtera gurea bezalako produktuak hazten ari dira. Lehenengo urtetik, orain lau urte, aurtengora arte etengabe igo da ekoizpena. 2019an produkzioa 500 mila litro ingurun ibiliko gara. Ikusi besterik ez dago zer geratzen ari den Estatu Batuetan, Erresuma Batuan... portzentaia asko igo da eta kontsumitzen den guztiaren ehuneko interesgarria lortu du artisau garagardoak».
Estatu Batuetan artisau garagardoak, merkatu kuotaren %12,2 du, %8,4 Erresuma Batuan, %6,5 Kanadan, %3 Frantzian. Euskal Herrikoarekin alderatuta portzentai askoz ere altuagoak. Hala ere pixkanaka goranzko bidean dago artisau azoka erraza ez den arren.
Oraindik ere bide luzea dago egiteko Euskal Herriko datuak baxuak direlako. «Jende desberdinentzako garagardoa egiten dugu eta probatzera animatzen dugu jendea».