Laugarren jardunaldia, Ohorezko Mailan, gaur jokatuko du Hernanik Santanderren, 16:00etatik aurrera, Aldo Independienteren aurka. Nahiz eta partidu zaila izan, konplexurik gabe, hernaniarrak garaipenaren bila irtengo dira eta denboraldiko lehendabiziko lau puntuak batu nahi dituzte.
Bostetik, lau kanpoan
Egutegi gogorra du Hernanik denboraldi hasiera honetan, laugarren jardunaldia ere kanpoan jokatuta. Eta hori gutxi balitz bosgarren jardunaldia ere, hilaren 20an, kanpoan jokatuko du. Beraz lehendabiziko bost partiduetatik lau bisitari bezala izango dira eta Landaren ez du jokatuko urriaren 27ra arte. Horrek kanpoan garaipen bat lortzearen garrantzia areagotzen du eta Santanderrekoa aukera izan daiteke.
Horretarako dena ongi egin beharko dute aurkaria maila oneko taldea bait da. Independiente beti egoten da play offetarako borrokan. Gainera aurten taldean ez daude beste urteetan bezala aldaketa askorik. Sei-zazpi jokalari berri fitxatu ditu, eduki dituen bajen ordezko. Hiru partidu jokatu ditu eta bakarra irabazi du, Burgosen kanpoan jokaturikoa, beste biak berriz, etxean, galdu egin ditu Santboiana eta Alcobendasen kontra. Sei punturekin bederatzigarren dago sailkatuta.
Hernani berriz azkenaurrena da puntu bakarrarekin eta bere atzetik Burgos bakarrik dago. Puntuak lortzea beharrezkoa bihurtzen ari da, nahiz eta zailtasunak asko izan. Orain arteko bi partiduak etxetik kanpo, erraz galdu ditu, baina Santanderren San Román zelaian, normalean ongi jokatzen du Hernanik eta garaipenetik gertu xamar geratzen da.