Ikasturte berria hasi da, eta Kutxa Ekoguneak martxan dauka, aurten ere, Hezkuntza Programa. Adin-tarte guztietara egokitutako tailerrak eskaintzen ditu, ingurumen arloko gaiak lantzeko.
Esperientzian oinarritutako tailerrak izaten dira, praktikoak, ikasleek ikastetxean lantzen dutenaren osagarri. «Esperientzia bat eskaintzen diogu ikasleari. Ez dugu zuzenean jakintza transmititzen; beraiek lortzen dute, esperientziarekin. Errazago eta hobeto txertatzen da horrela».
Zerbait eginez, ikasi
Esperientzia bat bizitzea, zerbait praktikoa egitea. Horixe da giltza, Kutxa Ekoguneako Hezkuntza Programako tailerretan. Horregatik, kanpoan egiten dira tailerrak.
«Eskuak zikintzen dira, zerbait egin eta ikasteko. Gelarik ez dago. Belardi, baratza, baso edota abeletxea dauzkagu. Lortu nahi duguna da, jakintza horretan oinarrituta, etorkizunean zenbait ekintza egiteko prest egongo den gizartea. Informazioa bazter guztietan dago. Nahi duguna da, sentsibilizaziotik ekintzara pasatzea».
Hartz polarra, edo astoa?
Tailer guztiak dira praktikoak, baina gai desberdinak lantzen dira. Horregatik, ikastetxeekin zuzeneko harremana izaten dute, landu nahi den gaira eta adin-tarte bakoitzera egokitzeko. Haur Hezkuntzatik hasi eta DBHra arteko ikasleak hartzen dituzte Kutxa Ekogunean, eta baita unibertsitate eta lanbide heziketako ikasleak ere, PLUS16 programarekin. «Harremanetan egoten gara ikastetxeekin. Ikastetxean lantzen denaren osagarri izan nahi dugu, hemen ikasitakoa han ikasitakoarekin uztartu».
Lantzen den gaietako bat izaten da animaliekin lotutakoa. «Adibidez, espezien desagerpena. Askotan, hartz polarra jartzen da adibide! Guk, astoaz hitz egiten dugu, bertakoaz!». Baina ez dute hitz egin bakarrik egiten; abeletxean animaliekin egoteko aukera izaten dute. «Arrazak ikasten dituzte askotan ikasleek. Kutxa Ekogunean, animalia horiek denak bizirik, eta beren ingurunean ikusiko dituzte. Ez dituzte morfologikoki bakarrik ezagutuko. Haien izaera ere ezagutzen dute. Konturatzen dira espezie arraza bat baino gehiago, indibiduoak direla. Enpatia lantzen dute. Sorpresa handiak izaten dira. Ikusten dituzte animaliak benetan diren bezala, eta ez ataka baten atzean, jarritako lekuan jaten».
Haur Hezkuntzatik DBHra arteko ikasleei eta unibertsitate eta lanbide heziketako ikasleei egokitutako tailerrak eskaintzen ditu Kutxa Ekoguneak.
Abeletxean teknikari espezializatu baten eskutik jasotzen dute ezagutza, indibiduo bakoitzaren inguruan. «Konturatzen dira, adibidez, oilo arraza asko dagoela, ez dagoela oilo gorririk, kolore askotakoak direla... Edo ahate batek oilo baten txita hazi dezakeela. Edo astoak oso inteligenteak direla! Edozein tramankulu mugitzeko gai dira ahoarekin».
Era berean, baratzagintzari lotuta, adibidez, txikienentzako tailer ludikoagoak eskaintzen dituzte, jostagarriagoak. «Lurra ondu, ureztatu, ongarri desberdinak prestatu...», egiten dute. Helduagoekin, berriz, esperientzia horri kontzeptu teknikoagoak gehitzen dizkiote: Zero Kilometroa kontzeptua, krisi klimatikoa... Era berean, PLUS 16 programarekin, eraikuntza edo egurgintzarekin lotutako ikastetxeetako ikasleak ere gerturatzen zaizkie, eta erakusten diete nola egin duten egurrez egindako haur parkea, bioeraikina... Denentzako daude aukerak. «Hezkuntza maila guztietara eta mota ezberdinetara iritsi nahi dugu.
Egonaldi luzeak ere bai
Tailer hauek guztiak Galarretatik Rekalderako bidean dagoen Kutxa Ekogunean eskaintzen dira. Baina egonaldi luzeetarako ere badago aukera.
Etxarri-Larraunen (Nafarroa) natur balio paregabeko eremu batean kokatutako Ingurumen Eskola badago, ikastetxeek 2, 3, 4 edo 5 eguneko egonaldiak egin ahal izateko. Naturan bizi eta hainbat jarduera eta ibilaldi egin ditzakete bertan, animalien aztarnak behatzeko, orientazioa lantzeko, ukenduak egiteko...
Garai guztiak, onak
Ikastetxeak Kutxa Ekogunearekin jarri daitezke harremanetan, tailerren bat hartzeko: hezkuntza@ekogunea.eus. Ordu eta erdikoak izaten dira gehienak, eta normalean, bat baino gehiago egin eta bertan egun-pasa egiteko aukera izaten da.
Ingurumena aldakorra denez, urtaro guztiak dira egokiak, bisita egiteko. «Etortzen direnean etorrita ere, gauza desberdinak ikusiko dituzte». Informazio gehiago lortzeko: www.ekogunea.eus.