Iritsi da Bakailu Astea, «Hernaniko gure egutegian data seinalatua», Xabier Lertxundi alkatearen hitzetan. Atzo aurkeztu zuten, alkateak berak, Mertxe Jimenez Berriak elkarteko ordezkariak, eta Gurutze Amigorena turismo teknikariak; eta datorren astelehenean hasiko da, herriko taberna eta jatetxeetan.
Tabernen arteko bakailu pintxo lehiaketa izango da, beste behin, herrian saltsa jarriko duena. 26 tabernak hartuko dute parte, «iaz baino bi gutxiago, baina batzuk berriak dira», Jimenezek azaldu zuenez. Hilaren 18ra arte dastatu ahal izango dituzte herritarrek, bakoitza 1,5 euroan; eta azkeneko egunean, 20:00etan jasoko dituzte botoa emateko kutxak: «aurten, hiru pintxo onenak aukeratu ahal izango ditu bakoitzak, ez onena bakarrik». Banatuko duten eskuorrian, gainera, bakoitzaren balorazioa egin ahal izango dute, itxura, zaporea eta zailtasuna puntuatuz, azkeneko bozketa errazagoa izateko.
Hiru pintxo onenak sarituko dituzte, hilaren 20an, eguerdiko 12:00etan udaletxean. Eta bozkatzen duten herritarren artean, zozketatuko dute lau lagunentzako otordua, Errioguarda jatetxean.
Bakailu Festarik ez, aurten
Izan ere, aurten ez da egingo Bakailu Festa, azkeneko egun horretan, «Atsegindegiko obrak direla eta. Beste toki batera mugitzea zaila zen, eta aurten ez egitea erabaki dugu, datorren urterako buelta bat eman eta festa birpentsatzeko. Berrikuntzak behar dituela uste dugu», azaldu zuen Jimenezek.
Hori izango da aurtengo nobedadeetako bat; «eta bestea, menu tematikoak jarriko direla herriko bi jatetxetan, Iturralden eta Errioguarda-Enean, hain justu», nabarmendu zuen Lertxundik. Hilaren 7tik 20ra bitartean izango dira aukeran, bakailuarekin tematizatutako menu horiek.
Pil-Pil maskotarekin, jokua eta saltsa
Gainerakoan, aurreko urteotako zitak izango dira bueltan. Horrela, Pil-Pil maskota aurkitzeko jokua izango da, komertzioetan jarritako karteletan: hirutan bakarrik egongo da Pil-Pil, eta aurkituz gero, dendariari esan eta tiketa jasoko dute. Hiruak aurkitzen dituztenek, saria izango dute.
Baina karteletan bakarrik ez, kalean saltsa jartzen ere ibiliko da maskota, hilaren 8, 15 eta 17an. Eta kaleak alaituko ditu Rockalean taldeak ere, beste urte batez, 18an.
URRIAK 7-20
Bakailu menua jatetxeetan. Bakailua jarriko dute beraien menuan edo kartan, Errioguarda-Enea eta Iturralde jatetxeek.
URRIAK 7-18
Tabernen arteko bakailu pintxo lehiaketa. 26 tabernak hartuko dute parte: Andrekale21, Antziola, Apeadero, Aralar, Atxur, Deportivo, Goiz Argi,
Goiz Eguzki, Guria, Harresi, Horbel, Joxe Mari, Juxto, Kafe Arri, Karrero, Kitto, Kixkal, Latxunbe, Oindi, Rioja, Tamer, Tripontzi, Txilibita, Txoko, Vinoteca Otaegi eta Zinkoenea.
Non dago Pil-Pil? jokua. Komertzioetako karteletan Pil-Pil hiru aldiz topatzen duenak, saria jasoko du.
URRIAK 8, 15 eta 17
Pil-Pil kalean! kale animazioa, arratsaldeko 18:00etatik aurrera. Bakailu Asteko maskota kalean ibiliko da saltsan, ea nork topatzen duen!
URRIAK 12, larunbata
Bisita gidatua, Hernaniko hirigune historikoan, goizeko 11:00etan hasita, euskeraz. Ez da izena eman behar.
URRIAK 13, igandea
Bisita gidatua, Hernaniko hirigune historikoan, goizeko 11:00etan hasita, gaztelaniaz. Ez da izena eman behar.
URRIAK 16, asteazkena
Bisita gidatua, Albaola Itsas Kultura Faktorian, arratsaldeko 16:30etan hasita, euskeraz. Itsasontziz egingo dute joan-etorria, Trintxerpetik Albaolara. Izena eman behar da: Biteriko turismo informazio puntuan, 943 33 70 28 telefonoan (goizez), edo turismoa@hernani.eus eta gurutze-a@hernani.eus helbide elektronikoetan. Urriaren 11ra arte dago epea; zozketa, 14an Biterin.
URRIAK 18, ostirala
Rockalean kale animazioa, arratsaldeko 19:00etatik 21:00etara.