Hasi bezala, bukatu egin zen atzo 11/13 makroepaiketa,?Auzitegi Nazionalean. 47 auziperatuetako 45 aske geratu dira; tartean, Aiert Larrate abokatu hernaniarra eta Amaia Esnal, Ereñotzun bizi den Herrirako kidea. Espetxealdia bukatu beharko dute, aldiz, Arantza Zuluetak eta Jon Enparantzak.
Fiskaltzarekin akordioa lortzeko, leporatu zaizkien delituak onartu dituzte 47 auziperatuek; Etxerat, Herrira, eta Jaiki Hadi elkartekoak eta abokatuak eta bitartekariak, denak.
«Gazi-gozoa», emaitza
Bueltako bidean zetoztela hitz egin zuen Kronikak Aiert Larrarterekin, eta sentsazio «gazi-gozoarekin» geratu direla aipatu zuen. «Batetik, behartuta egon garelako horrelako erabaki bat hartzera gurea ez den tribunal baten aurrean, gureak ez diren arauekin, gurea ez den egoeran. Bidegabekoa da guztiz, horrelako erabakia hartu beharra, eta batzuk barruan geratu beharra».
Hala ere, argi utzi zuen «erabaki guztiak aho batez eta batera, eta erantzukizunez hartzea» adostu zutela auziperatuen bileretan, «eta horrela izan da».
Kontu korronteak, itxita
Auzitegiko emaitzaz aparte, jasotako elkartasuna ere eskertu nahi izan zuten atzo.
«Gastuak baino haundiagoa izan da laguntza biltzeko kontu korrontean jasotako dirua. Goizean itxiko dugu, eta diru hori guztia bideratuko da beharra dagoen eremuetara, presoekiko solidaritate eremura».
Hain zuzen, jasotako babesa bezainbeste helarazi nahi izan dute auziperatuek ere. «Gure besarkada solidarioena helarazi nahi diegu beharra dutenei, zapalduei, Altsasukoei, erasoak jasaten dituzten emakumeei».
Berriro egiteko prest
Akordioa lortzea ez da erraza izan. «Akordiorako aukera udaran ireki zen, baina baldintza zen ez ezer iragartzea, ezta negoziaketarik bazegoenik ere».
Auziperatuek delituak onartu behar izan dituzte eta «etorkizunean politikoki bere eragina» izan dezake. Era berean, hiru urteko erabateko inhabilitazioa ezarri zaie kargu edo enplegu publikoetan aritzeko. Dena den, «berriro egingo nuke» leloa izan dute gogoan, bide honetatik gehiago lortu daitekeelakoan. «Akordio honekin ere berriro egiten jarraituko dugu, erantzukizunez, kolektiboaren mesedetan».