Jabetze Eskolak ere martxan jarriko dira eta hasteko, urtero legez, kontzertu bat antolatu da ostiralean 22:00etatik aurrera. Emakumeentzako Jabetze Eskolei hasiera emateko, antzina emakumeen topaleku, lanleku eta hizketa-txoko izan zen espazioan bertan eman nahi zaie berriro ere protagonismoa emakumeei, Leokako labaderoan.
Txoko hori emakumeentzako berreskuratuta, urteetan haiek egindako lan ikusezina omentzeko aukera baliatu nahi dute.
Aurtengoan hernaniarrez osatutako hirukote bat izango da protagonista, Bihotx: Gema Ines Murillo, Lara Mitxelena Martín eta Ixiar Jauregi Loiartek osaturikoa.
Txalaparta soinuak
Euretariko bakoitzak musikan ibilbide desberdina izan badu ere, hiruek musikarekiko zaletasuna konpartitzen dute. Txalaparta izango da emanaldi honetako protagonista nagusia. Euskal Herriko musikaren oinarri den tresna honek, denboran zehar izan duen garapena azaltzea du helburu emanaldiak. Beste instrumentu, dantza eta kantuekin uztartuz, umorea ardatz, gozotasun momentuak biziaraziko dizkiete hurbildutakoei.
Portu eta Elizatxora doan bidea moztuta bi orduz
Kontzertuak irauten duen bitartean Portu eta Elizatxora doan errepidea moztuta egongo da, gaueko 21:45etatik 23:30ak arte (kontzertua bukatu arte).
Euria eginez gero, hurrengo ostiralera arte, irailaren 20ra arte, atzeratuko da.
Jabetze Eskolen udazkeneko tailerrak, eskaladarekin hasi dira, eta urrian, azaroan eta abenduan jarraituko dute egitarau zabalarekin. Plaza feministan, 943 33 70 17 telefono zenbakian edo berdintasuna@berdintasuna.eus helbidean eman daiteke izena.