Hernaniko Euskal Jaiak asteburu honetan ospatuko dira Kaxkoa erdigune izanda. Benito Letxundiren kontzertuak eman zion hasiera egitarauari, baina larunbata eta igande honetan antolatu dira beste ekitaldi guztiak. Udalak herriko eragileekin antolatu du programa eta berrikuntza nagusia igandean, 19:30etan, Dantzaz konpainiak eskainiko duen Basoa ikuskizuna izango da, Tilosetan. Euria eginez gero Atsegindegin eskainiko da.
Berrikuntza hori kenduta aurreko urteko egitarau zabala errepikatuko da. Urtetik urtera eta batez ere azken boladan programa polita eta erakargarria prestatu dute hernaniar guztientzat, eta denak animatu nahi dituzte antolakuntzatik, Euskal Jaietan parte hartu eta ondo pasatzera.
Mota guztietako ekintzak antolatu dituzte garai bateko bizimodua goraipatzeko; Abeltzain azoka, Talo dastatzea, baserriko lanbideen erakustaldia, antzinako jokoak, txakolin dastatzea, musika, kantuak, herri kirolak, trikitixa, pelota, dantzaldia, artisau azoka, sagardo dastatzea, erromeria dantza ikuskizuna... denetarik egongo da.