Orain bi urte, 2017an, hasi zuten Mendiriz Mendi elkarteko kideek, Camillen Bidea izeneko ibilbide zirkularra. Eta asteburu honetan emango diote bukaera, azkeneko bi etapak (seigarrena eta zazpigarrena) osatzeko zita jarri baitute.
Horrela, Lescunetik Linzako aterpetxera doan etapa egingo dute larunbatean. 18 kilometro dira, 1.275 metro gorantz eta 780 metro beherantz eginda; eta sei ordutan egitea espero dute. Igandean, berriz, Linzatik Hechora doana osatuko dute: 21,5 kilometro, 1.200 metro gorantz eta 1.600 metro beherantz. Zazpi ordu inguru aurreikusi dituzte, bigarrenerako.
Izenematea, ostegunera arte
Joan nahi duenak, ostegunera arte dauka izena emateko, baina 25 lagunentzat dago tokia, gehienez. Elkartean egin behar da, gaur edo ostegunean, iluntzeko 20:00etatik 21:00etara. 75 euro dira bazkideentzat, eta 85 euro gainerakoentzat. Apuntatzeko momentuan, 40 euro ordaindu beharko dira. Prezioaren barne daude, bidaia eta egun bat pentsio erdira. Goizeko 06:00etan abiatuko dira larunbatean, Atsegindegitik.