Gaurtik hasita, antzerki saioak egingo dituzte Vito Rogado eta Naiara Arnedok, Osiñagako auzoan. Errotaran Goikoa baserrian izango dira, uztaileko eta abuztuko ia ostiral eta larunbat guztietan (abuztuaren 9am eta 10ean izan ezik), arratsaldeko 18:00etatik aurrera. Javi Alonsoren zuzendaritzapean, bi aktoreek Valium obra antzeztuko dute. Norberaren burua engainatu eta ez garen pertsonaren errealitate faltsua eraikitzeko ohituran dago oinarrituta.
Antzerkia eta gero barbakoa, aire librean
Plan berezia eskaintzen dute Rogado eta Arnedok, Errotaran Goikoan. Antzerkia bera aire librean egingo dute, Valiumteatro izeneko antzokian. Honen helburua da, «antzerkia dosi txikitan eskaintzea, udako hilabeteetan bakarrik», diotenez. Valiumteatron toki mugatua dago, berrogeita hamar lagunentzako, eta asmoa da giro berezia sortzea, antzezleen eta publikoaren artean.
Osiñaga auzoan dagoen Errota baserrian dago kokatuta Valiumteatro. Bertan, Vito Rogado eta Naiara Arnedok uda osoan zehar antzeztuko dute, gaur estreinatuko duten obra. «Valiumteatro espazio naturala da», dio Rogadok. Horregatik, garrantzitsua da azpimarratzea, eguraldi txarra edo euria eginez gero, ez dagoela beste aukerarik, eta obra bertan behera geldituko dela.
Valiumteatrok arratsaldeko 18:00etan irekiko ditu ateak, eta 19:00etan hasiko da antzerkia. Ordubeteko iraupena izango du, eta honen bukaeran, barbakoa egingo da, gerturatu direnekin eta obra egin dutenekin batera. Sarrerak 15 euroan daude salgai, eta telefonoz edota WhatsApp bidez eskura daitezke 649874184 zenbakian. Erreserba egin daiteke, baita ere, javialonso@mac.com emailera idatzita. Gaurko eta biharko saioetarako sarrerak bukatu dira, dagoeneko.
Antzerkiko egunean eguraldi txarra eginez gero, bertan behera geldituko da plana.
Valium, komedia antzerkia
Valiumteatro antzokiak urteak daramatza martxan udako hilabeteetan, eta Valium ere, jada estreinatu zuten bertan. Hala ere, oraingo honetan aldaketa txiki bat dago: aurrekoetan Sandra Ferrúsek antzezten zuen bi pertsonaietako bat, Rogadorekin batera; eta oraingoan, berriz, Naiara Arnedok hartu dio erreleboa.
Lagun minak diren bi pertsonaia irudikatuko dituzte, Rogadok eta Arnedok. Biek bizi dute momentu gorabeheratsua, beren bizitzetan, eta hainbat arazo dauzkate, nerbio-sistema aztoratzen dietenak. Horiek konpondu nahian, arratsalde latza biziko dute, bi protagonistek. «Valium gure burua engainatzeko daukagun ohitura tuntunean dago oinarrituta; ez garenaren pertsonaren itxura ematean, alegia», dio Rogadok.
Telesailetan eta zineman aritutakoa, Rogado
Aurrekoetan bezala, ez du hutsik egingo Rogadok, Valium obraren saio berri hauetan ere. Ibilbide profesional oparoa du aktore gisa, eta antzerkian ez ezik, telebistan eta zineman ere aritu da lanean. Besteak beste, Aktore Euskaldun Onenaren Saria jaso zuen 2011an.
Eszenatoki gainean aktore lanetan aritu da, Te invito a una copla, La vida y sus cosas, El club de las mujeres invisibles, Comida para peces, Walt Disney me jodió la vida, Sopa de Ganso, edota Bang obretan.
Telebista munduan, berriz, Ciudad K, Cuestión de sexo, Mi querido Klikowsky, Algo pasa con López, edo La gran evasión telesailetan hartu du parte.