Sekulako denboraldia burutu du Anartz Artola Arin hernaniarrak, mendi lasterketetan; eta Zumaia Flysch Trailen borobildu zuen, Espainiako Kopako azkeneko proban. Laugarren sailkatu zen, 22 kilometro eta 850 metro positiboko proban, eta horrekin, bigarren bukatu zuen, junior mailako Espainiako Kopan.
Animorik ez zuen falta izan hernaniarrak Zumaian, lagun asko joan baitziren bertara; eta helmugara iritsi zenean, elkarrekin ospatu zuten denek, lortutakoa.
Oso erregular, Kopan zehar
Guztira, sei probak osatzen zuten Espainiako Kopa, baina korrikalari bakoitzaren lau emaitza onenak hartzen ziren kontutan, azken sailkapenerako. Kopa osoan zehar, oso erregular aritu da hernaniarra: hiru aldiz egin du bigarren (Borriolen, Alhaurin El Granden eta Kanpezun), behin hirugarren (La Puebla de Don Fadriquen), eta beste behin laugarren (Zumaian); Otañesen ez zuen parte hartu. Are gehiago, bera izan da denetan erregularrena, parte hartu duen proba guztietan bost onenen artean sailkatu den bakarra; eta lider ere izan zen bi aldiz. Hala iritsi zen Zumaiara.
Baina azkenean, Marc Vizcaino kataluniarrak hartu zion aurrea, Zumaian irabazita. Azken sailkapenean, 358 puntu lortu zituen Vizcainok, eta 350 puntu Artolak.