Orain dela 20 urte hasi zen Orona euskararen sustapenerako lanetan, eta 2002an diseinatu zuen lehenengo Euskara Plana. Ordutik, laneko arlo guztietan euskararen erabilera eta presentzia handitzeko lanetan ibili da.
Oronako Euskara Planaren helburu nagusia langileen artean euskararen erabilera sustatzea da, eta azken urteotan, helburu horrekin lotutako ekimen ezberdinak jarri ditu martxan. Horien artean, 2016an Soziolinguistika Klusterrak garatutako Eusle Metodologian oinarritutako egitasmo bat jarri zuen martxan Oronako sail ezberdinetan. Egitasmo horretan, langileek euren artean euskaraz egiteko konpromisoa hartu zuten epe jakin batean, eta hizkuntza-ohiturak aldatzea posible dela ikusi zuten.
Orona, ‘BaietzHernanik!’rekin eta Euskaraldiarekin bat
Orain arte egindako bideari segida emateko, Oronaren helburuarekin bat datozen bi egitasmotan parte hartu du aurten: Baietz Hernanik! eta Euskaraldia.
Baietz Hernanik! egitasmoa sustatu dute lankideen artean eta horretarako, sentsibilizazioa eta motibazioa lantzeko 9 lan-saio egin dituzte Euskara Ari Du elkarteko bi kideren laguntzarekin. 100 langile inguruk parte hartu dute lan-saioetan.
Saio horiek, lankideen euskararekiko ahalduntzearen
bidean urrats bat gehiago ematea izan dute helburu, hizkuntza ohiturak aldatzeko asmoarekin. Horrez gain, saioetan parte hartu dutenei, lan-eremuan hizkuntza ohituraren bat aldatzeko konpromisoa hartzea proposatu diete. Horrela, Oronako lankide diren 110 erronkalari dituzte egitasmoarekin bat egin dutenak.
Euskaraldiari dagokionean, Orona egitasmoaren erakunde sustatzailea da, eta langileei izen-ematea errazteko bideak jartzeaz gain, Euskaraldiaren inguruko informazioa zabaldu du eta Euskaraldiak iraungo duen 11 egun horietarako ekimen ezberdinak prestatu ditu baita ere.
Euskararen Eguna, egun berezia Oronan
Horrez gain, urtero Euskararen Egunerako ekimenen bat
antolatzen du Oronak, eta aurten ere, Euskaraldiari amaiera emateko prestaketa lanetan dabil Hernaniko Kooperatiba.