Etxerat elkarteak jakinarazi duenez, Asier Ezeiza Aierra preso hernaniarra Frantziako Mont de Marsan espetxera gerturatu zuten ostegunean. Euskal Herritik 750 kilometro ingurura dagoen Tarasconeko espetxetik hurbildu dute, 160 kilometrora dagoenera.
Ezeizarekin dagoeneko 14 dira azken hilabeteetan gerturatu dituzten euskal presoak. Mont de Marsan eta Lannemezaneko kartzeletara eraman dituzte. Hernaniarra 2008an atxilotu zuten, ETArekin zerikusia izatea leporatuta.
Espainian, urrutiratua
Desberdina da, ordea, Ugaitz Errazkin Telleria preso hernaniarraren kasua.
Errazkin Madrilgo Soto del Real espetxean zegoen, apirilaren 18an estraditatu zutenetik, sei urteko kondena beteta. Orain gutxi, berriz, ekainaren hasieran, Madriletik Algecirasera eraman dute, eta beraz, etxetik 1.095 kilometrora dago orain.