Pixkanaka aurrera dijoa Hernani Erabaki aurrekontu parte-hartzaileen prozesua; pasa den maiatzaren 17an aurkeztu zituzten herritarrek egindako proposamenen nondik norakoak. Denera, 376 proposamen aurkeztu dira, eta orain, horietatik 100 hautatu beharko dituzte herritarrek.
Horretarako, leheneste faseari, prozesuko bigarrenari emango zaio hasiera etzi, asteazkenean. Lau saio egingo dituzte, gaika, eta bertan egingo da hautaketa. Azaldu dutenez, «saio bakoitzean 50 proposamen landuko dira; hauetatik, erdia kanpoan geratuko da, eta beste erdia, hurrengo fasera pasako da: balorazio teknikoa egitera, hain zuzen».
Kontuan hartu behar da egin diren proposamenetatik 200 geratuko direla, errepikatuak eta eskumenetik kanpo daudenak kenduta.
Bilera guztiak udaletxean izango dira 19:00etan hasita, eta zaintza zerbitzuarekin.
LEHENESTEKO BILERAK
- ETZI, maiatzak 30: argiteria, garbitasuna, hondakinak, komun publikoak, eta jarduera fisikoa eta kirolak.
- MAIATZAK 31, OSTEGUNA: herri segurtasuna, mugikortasuna (aparkalekuak, bide segurtasuna, bidegorriak eta bizikletak, garraio publikoa, oinezko bideak, trafikoa), tokiko garapena, merkataritza, elikadura subiranotasuna eta ingurugiroa.
- Ekainak 6, ASTEAZKENA: espazio publikoa, berdeguneak, parkeak, plazak, txakur parkeak, gizarte zerbitzuak, gazteria eta berdintasuna.
- EKAINAK 7, OSTEGUNA: hirigintza, herri lanak, herri mobiliarioa, kultura, ondarea, musika, partaidetza, hezkuntza-heziketa eta auzoetarako proposamenak.
Nerabeentzako ikastaroak sortzeko deia, herriko kultur eragileei
«Ikastaroen helburuak nerabeen artean sormena sustatzea izan behar du: gazteak kultura kontsumitzaile hutsetik sortzaile izatera pasatzea da xedea», azaldu dute. Ekainaren 22ra arte egin daitezke proposamenak.
Hain zuzen, aurreko Hernani Erabaki prozesuan erabaki zuten hernaniarrek nerabe-gazteentzat antolatutako ekintza gehiago eskaini behar dituela Udalak, eta horretan ari da. Gainera, diote, «amaitu berria den kulturaren inguruko hausnarketan gazte eta nerabeei zuzendutako eskaintzari buruzko kezka ere» jaso dela.
Kultur eragileekin batera, plangintza
Horren ondorioz, Kultura eta Gazteria sailek plangintza osatzeari ekingo diotela diote, herriko eragileekin batera. Hori dela-eta, eragileek ikastaro egitasmoak aurkeztu ahal izango dituzte; formatu laburreko ikastaroak izango dira.
Baldintza batekin: «ikastaroen helburuak nerabeen artean sormena sustatzea izan behar du: gazteak kultura kontsumitzaile hutsetik sortzaile izatera pasatzea da xedea», azaldu du Udalak.
Gaiari dagokionez, mota askotakoak izan daitezke, adibideak jarri dituzte: bideogintza eta zinemarekin erlazionatutako tailerrak, komiki munduan murgiltzen direnak, teknologia berriekin lotuak, arte ederrekin konektatzen dutenak...
HHZn, proposamenak
Ekainaren 22ra arte aurkeztu ahal izango dira proposamenak HHZn (943 33 70 00); informazio gehiagorako www.hernani.eus web orrira jo behar da. Proposamenak aztertu, eta gazteek beraiek bozkatuko dituzte irailean; boto gehien jasotzen dituztenak egingo dira.